7 июльста Саранскяйса, И.Д.Воронинонь лемса Мордовскяй республиканскяй краеведческяй музейса, ётафтовсь «Эряфсь—легенда» лем ала патриотическяй мероприятия, кона лемтьфоль Советскяй Союзонь Геройть М.П.Девятаевонь шачема шиста 106 кизонь топодемати.
Справканьке: Советскяй Союзонь Геройсь, легендарнай лётчиксь-истребительсь Михаил Петрович Девятаев (1917-2002) шачсь 8 июльста Мордовиянь Торбеево посёлкаса крестьянонь семьяса. Казанскяй ляень техникумса и аэроклубса тонафнемать аделамдонза меле, 1938 кизоня ушедсь работама баркасонь, кона уендсь Волгать эзга, капитанонь помощникокс. Тяка кизоня тертьфоль служама Якстерь Армияв. 1940 кизоня аделазе Чкаловскяй военнай авиационнай училищать.
Великай Отечественнай войнать ушедомста Украинскяй 2-це фронтонь гвардиянь 104-це истребительнай авиаполконь звенань командирсь, старшай лейтенантсь Михаил Девятаев менелень тюремаса прафтсь-плхтась фашистскяй 9 самолётт. 1944 кизонь 13 июльста менелень стака бойса самолётоц крьвястьфоль и сон ранендафста сявфоль пленц.
1945 кизонь 8 февральста военнопленнаень группась Пенемюнде концлагерьса, кона ульсь германиянь Узедом островса, шавомок конвоирть, сявозе «Heinkel»-111 секретнай бомбардировщикть. Самолётса, конань вятезе лётчиксь Михаил Девятаев, синь ворьгодсть пленцта и валгсть советскяй войскань расположенияса. Секретнай даннайхнень вельде, конатнень синь пачфтезь миннетненди, Узедомса аэродромсь и ФАУ ракетань секретнай центрась ульсть тапафт-плхтафт.
1945 кизонь ноябрь ковста сявомок Михаил Девятаев ульсь запасса. Работась ляень Казанскяй портса ведьалдонь паця мархта пассажирскяй кораблень капитанкс.
Советскяй Союзонь Герой лемсь Михаил Петрович Девятаевонди максфоль 1957 кизонь 15 августста. Сон казьфоль Ленинонь, Якстерь Знамянь, I и II степенень Великай Отечественнай войнань орденца, лама медальса. Михаил Девятаев Мордовия Республикань (1997 кизось), Казанень (1987 кизось), Германиянь Вольгаст и Циновичи ошень Почётнай гражданин.
Михаил Петрович Девятаевонь эряфонц и подвигонц колга сёрматфт книгат, стихт и ладяфт морот. Советскяй Союзонь Геройсь сёрмадсь книгат, коса азондсь эсь подвигонц колга. «Полёт к солнцу» и «Побег из ада» лем ала синь оцю тиражса нолдафтольхть Саранскяйса, Казаньца, Берлинца, Варшаваса, Софияса и Европань лия столицатнень эса.
Кулось М.П.Девятаев 2002 кизонь 24 ноябрьста. Калмаф Казань ошень Арскяй калмалангонь Героень аллеяса. Калмонц лангс путф стела, коса ащи М.П.Девятаевонь скульптурац.
Патриотическяй мероприятиять мяльса кирдезь тяфта жа панжевсь «Эряфсь—легенда» фотоснимкань и историческяй документонь выставкась, кона лемтьф Великай Отечественнай войнаса Сяськомати и М.П.Девятаевонь подвигонцты.
Мероприятияса примасть участия республикань культурань и искусствань, общественнай деятельхть, поэтт, писательхть, журналистт, Советскяй Союзонь Геройть М.П.Девятаевонь лемса «Мялям» поисковай отрядонь боецт, вузонь и колледжень студентт, школаса тонафнихть. Почётнай инжикс ульсь Геройть цёрац—Александр Михайлович Девятаев.
Патриотическяй мероприятиять и фотоснимкань и историческяй документонь выставкать, коса азондови Михаил Девятаевонь эряфонц и подвигонц колга, панжемаснон мархта пуромфнень поздравляндазень республикань культурань, национальнай политикань и архивнай тевонь министрть заместителец Николай Бычков. Сон мярьгсь, што патриотическяй работась народоньконь мархта, сембода пяк од ломаттнень ёткса, Культурань министерствань учреждениятнень эрь шинь работаса лиссь васенце вастти, сяс мес специальнай военнай операциясь, кона мольфтеви нацисттнень эзда соотечественниконьконь араламанкса, няфтезе: Россиянь лама национальностень народса патриотизмась шиса! Сонь эряви виияфнемс, азондомок тяниень пингонь од ломаттненди тяфтама Геройхнень, кода Михаил Девятаев, подвигснон колга.
Александр Девятаев азсь оцю спасиба музеень сотрудникненди и республикань Культурань, национальнай политикань и архивнай тевонь министерствань руководствати тя мероприятиять анокламанкса. Сон азозе, што тядде Волга ляйть эзга ушедсь уендема тяниень пингонь ведьалдонь «Метеор» теплоходсь, конанди максф «Михаил Девятаев» лем.
Мекпяли Александр Девятаев казсь музейти, республикань библиотекатненди и культурань лия учреждениятненди книгат, коса азондови Советскяй Союзонь Геройть эряфонц и подвигонц колга.
Мекпяли пуромфненди патриотическяй моронь концерт няфтсть Саранск ошень Культурань дворецонь солисткатне Ирина Беляева и Марина Кочеткова.
Тяка жа шиня М.П.Девятаевонь подвигонц лемс Мордовиянь сембе библиотекатнень эса ётафтовсть «Мужествань урокт». А 8 июльста, Советскяй Союзонь Геройть шачема шиста, патриотическяй мероприятият ётафтовсть Торбеево посёлкаса—М.П.Девятаевонь Кудса-музейса.
Владимир
Нестеров.