Ня шитнень Краснослободскяй райононь Сире Сендру велеса лятфнезь содаф и асу землякснон, мокшень поэтть, писательть и журналистть Иван Васильевич Чигодайкинонь. Тяса ётафтовсть II-це Чигодайкинскяй лувоматне. Пуромкссь лиссь пяк лямбокс, поэзиянь афкуксонь илакс. Лама корхтафоль поэтть творчестванц колга, лувфтольхть стихонза, лятфнефоль эряфонь аф тёждя киц.
Иван Васильевич Чигодайкин шачсь 1920 кизонь 11 сентябрьста простой крестьянонь семьяса. Сире Сендруса шумордазе семилеткать, сяльде тонафнесь Краснослободскяй педагогическяй училищаса, Мордовскяй госпединститутса. 1939 кизоня тертьфоль Якстерь Армияв. Иван Васильевич—Великай Отечественнай войнань участник, примась участия Москуть и Сталинградть инкса тюрематнень эса, Курскяй битваса. Тюрсь фашисттнень каршес аф аньцек оружияса, но и пераса, няфтемок эсь прянц цебярьдонга цебярь армейскяй журналистокс и литработникокс «Боевая красноармейская» и «Гвардеец» дивизионнай газетатнень эса. Казьф Якстерь Тяштень кафта орденца, боевой медальса.
Демобилизацияда меле Иван Васильевич тонафнесь Горьковскяй областной партшколань журналистскяй отделенияса. Аделамдонза меле ульсь Мордовскяй радиокомитетонь политвещаниянь редакторкс, «Строитель» газетань ответственнай секретарькс, «Кабельщик» газетань редакторкс, «Приборостроитель» газетань литературнай сотрудникокс.
Чигодайкинонь мокшень кяльса васенце стихонза лиссть 1938 кизоня «Колхозонь эряф» журналса, «Мокшень правда» газетаса. Тяшнесь очеркт и стихт фронтсовок, а войнада меле седиец кошардсь азондомс фронтонь китнень колга, кода аралафоль Родинась, кода тапафоль врагсь, кодама кеняртьфти тефт ушедсть тиендевома шачема ширеса. Стихонза лисендсть коллективнай ламоц сборникнень эса. Иван Васильевич сёрмадсь лама очерк, статья, фельетон Мордовиянь труженикнень колга, лихнезень лангти эряфонь афсатыкснень, шназень тевонь кельгихнень.
1951 кизоня Мордовскяй книжнай издательствась нолдазе «Шачема мастор» стихотворениянь васенце сборниконц, коза сувасть военно-патриотическяй темань и шачема крайть кельгоманц колга стихонза. 1959 кизоня башка изданиякс нолдафоль Чигодайкинонь «Кши и сал» поэмац. Сон кандсь теенза оцю поэтическяй слава. Тя поэмась нолдафоль и рузонь кяльса. Произведениять эса авторсь азонды ломаттнень стака эряфснон колга, кода велева кемокснесь Советскяй властсь, кода ся пингть стясть и хозяйственнай оцю сталмотне. Тяфтама велекс и ульсь ингольдень Сире Синдровскяй райононь Колапа велесь.
Иван Васильевичень кой-кона стихонзон лангс композиторсь Г.Павлов сёрмадсь музыка («Комбайнерка», «Мордвин» и лиятнень).
Сембоц авторть лиссть стихонь ниле сборниконза: «Шачема мастор», «Кши и сал», «Ёндолсь кфчядсь», «Кшить таньфоц».
1966 кизоста сявомок Чигодайкин СССР-нь Писателень союзонь член.
Поэтсь тусь эряфста 1985 кизонь 21 ноябрьста. Калмаф Саранскяйса.
Сире Сендру велень эряйхне аф юкснихть колганза. 2020 кизоня келиста и мяляфтовиста ётафтфоль Чигодайкинонь шачемста 100 кизонь топодемати лемтьф илась, а сяльде сафоль мяльс эрь кизоня ётафнемс Чигодайкинскяй лувомат.
Омбоце лувоматненди Сире Сендру велень школав пуромкшнесь аф кржа ломань. Почётнай инжихнень ётксоль Российскяй Федерациянь Сенаторсь, Россиянь Финно-угорскяй нароттнень Ассоциацияснон председателец, Сире Сендру велеса шачф-касф мокшалясь Пётр Тултаев.
—Тейне удалась улемс аф ламода содафокс Иван Васильевич Чигодайкинонь мархта,—азозе Пётр Николаевич.—Шабалень эста, мзярда поэтсь сашенткшнель Саранскяйста Сире Сендрув—шачема-касома уженязонза. Мялямсон сон лядсь интеллигентнай, оржа ёнь мархта ломанькс. Тячи минь лама корхнетяма ся кепотькснень колга, конатнень лангса ули кода касфтомс-воспитандамс од поколениять. Иван Васильевичень творчествац и эряфонь киц—тя эсь наротценди и Родинати служамань цебярь пример. Мзярда фашисттне врьгядсть странаньконь лангс, сон эста пединститутонь студентсь, войнань васенце шитнень ни тусь доброволецокс сонь араламонза. А сяльде патриотическяй темась занясь оцю и няевикс васта стихонзон и поэманзон эса. Сире Сендру велень поэтть Иван Чигодайкинонь творчествац—странаньконь литературнай наследиянц пяльксоц.
Пётр Николаевич Тултаев лувозень земляконц мокшень кяльса стихонзон и азсь мяль нолдамс од сборникса сонь произведениянзон.
Чигодайкинонь творчестванцты оцю питне макссть Мордовия Республикань Народнай поэтсь Рая Орлова, Мордовия Республикань Заслуженнай писательсь Николай Голенков. А.С.Пушкинонь лемса Национальнай библиотекань отделонь главнай библиотекарсь Вера Пронина няфтсь презентация Чигодайкинонь творчестванц и эряфонц колга, азондсь художественнай произведениянзон квалма, конат ванфтовихть библиотекать фондонзон эса. Тяда башка, Вера Ивановна казезень Мордовскяй (мокшень и эрзянь) народть Межрегиональнай общественнай организациянц Благодарностенц мархта Сире Сендру велень кой-кона эряйхнень, конат лама тиендихть мокшэрзянь культурать, кяльхнень, койхнень-обуцятнень ванфнеманкса-виияфнеманкса.
Мокшень и рузонь кяльса эсь стихснон, а стане жа Чигодайкинонь стихотворениянзон пуромксса лувозь МР-нь Заслуженнай писательсь Николай Циликин, «Якстерь тяштеня» идень журналть главнай редактороц Вера Брындина, Краснослободскяй райононь «Слобода» литературнай объединениянь члеттне, Сире Сендру велень школань тонафнихне.
Иван Васильевич Чигодайкин ётась эряфонь аф тёждя ки, служась перанц мархта мокшэрзянь литературати и журналистикати. Кадсь эсь мельганза цебярь стихт, поэмат, очеркт и морот. Сонь произведениянза лядсть эряфса и ломаттнень седиса.
Ольга ЕВДОКИМОВА.
Фототне Николай КАРАНОВОНЬ.