Атюрьевскяй райононь эряйхнень Юрий Иванович и Юлия Ивановна Волгапкиттнень семьяса тяддень 12 январьста шачсь стирнясна Екатерина.
Юрий и Юлия рьвяясть 2014 кизоня. Мирттне-рьвятне шачсть и кассть Атерьса. Тя пингс эряйхть и покодихть шачема уженясост: Юлия—2№ Атюрьевскяй средняй общеобразовательнай школаса учителькс, Юрий—Россиянь МВД-нь ГИБДДН-нь «Торбеевский» отделенияса инспекторкс.
24 январьста Атерь аймаконь ЗАГС-са павазу аляти торжественнайста максфоль стирняснон шачеманц колга свидетельствась. ЗАГС-онь сотрудникне поздравляндазь полатнень стирняснон шачеманц мархта и казсть атнайняти казне.
—Тя паваз и кенярдема аф аньцек тинь семьянтенди, но и марнек Атюрьевскяй районти, вдь тя аймакса эвондась тага фкя эряй, Россиянь тага фкя гражданин,—мярьгсь Олеся Атманзина одс шачинять тядянзонды-алянзонды васенце документть максомста.
Мирттне-рьвятне пяк павазуфт, мес синь семьясост шачсь ламос учсеф Екатерина стирнясна. Васенце иднясна Роман тонафни 2-це класса. Сонь пяк пара мялезонза, мес тяни соньге ули сазорняц.