22 апрельста Саранскяйса Мордовия Республикань Государственнай Собранияса ётафтовсь Мордовия Республикань сисемце созывонь Государственнай Собраниять кемонце сессияц, конань вятезе Госсобраниять Председателец В.В.Чибиркин. Сессиять работаса примась участия Мордовия Республикань Оцюнясь А.А.Здунов. Шинь повесткать кемокстамдонза меле депутаттне кярьмодсть работати.
Кемонце сессияса ванондовсь несколька кизефкс. Фкясь эздост сотф 2022 кизонди и 2023 и 2024 кизотнень плановай пингснонды Мордовия Республикань республиканскяй бюджетти полафтксонь сувафтомать мархта.
Мордовия Республикань финансонь министрть тевонзон тиендисна С.А.Тюркин, азондомок бюджетть колга законопроектть квалма, ушетксста пачфтсь васенце кварталть итогонзон колга. Налоговай и аф налоговай дохоттнень лувкссна Мордовия Республикань консолидированнай бюджетти 8 миллиартт 444 миллион цалковай, мезсь 332 миллион цалковайда сяда лама мелянь тяка пингть коряс, касомать темпоц тись 104,1 процент.
Республиканскяй бюджетть карьхценза касыхть 1 миллиард 560 миллион цалковайда ся средстватнень лятксснон вельде, конат апак нолдакт тевс финансовай кизоть ушедоманцты.
Сяда тов депутаттне примасть Мордовия Республикань башка закоттненди кой-кодама полафткст. Тянь мархта региональнай законодательствась тифоль федеральнай законодательствать мяльс сявозь. Фкя инь оцю полафткссь ащи сянь эса, што решениятненди, конат канневихть регионть высшай руководителензон социальнай, финансовай и административнай гарантияснонды, регламентировандафт кармайхть улема аф Мордовия Республикань Оцюнять Указонзон, а башка закоттнень мархта.
Вов мезе тя законопроектть колга мярьгсь Мордовия Республикань Оцюнясь А.А.Здунов:
— Заработнай платать, премиальнайхнень, лия пандоматнень ладямасна—семботи улема азфокс законца. Лиякс мярьгомс, ськамонза, корыстнай арьсематнень мяльса кирдезь, киндивок тяни кодамовок решеният примсемс аш кода. Сембось кармай улема панжадокс и эрявикс туфталхнень тевс нолязь,—китькстазе сон.
— Шинь повесткати сувафтф сембе кизефкснень ваномдост меле кемонце сессиясь шумордавсь.
Т.АЛЬШИНА.