28 февральста Мордовия Республикань экономикань, торговлянь и предпринимательствань министрть аф лама пингс тевонзон тиендисна А.В.Грибанов ётафтсь республикань предпринимательхнень мархта васедема, коса корхтамась мольфтевсь маластонь вете кизотнень Мордовия Республикать социально-экономическяй ширде касфтоманц-виияфтоманц колга. Кодама путксоц тянкса ули бизнесть, кодама лезкс максома предпринимательхненди? Ня кизефксне мекольдень пингть путневихть васенце вастти, синь сотнефт эряфса васьфневи прябалатнень мархта. Васенце перяфксокс тянди ульсь коронавируссь, тяни событиятне, конат сотфт Украинань модать лангса военнай операциять ётафтоманц мархта.
Омба масторонь санкциятне, конат цярахман лаца прашендыхть странаньконь лангс, васендакиге токсесазь предпринимательхнень тевснон вятемаснон. Вов мес арьсекшневихть од программат, примсевихть решеният тя сфераса покодихнень ширеснон кирдеманкса. Кепотьксонди, федеральнай бюджетста маластонь пингть Мордовияв максови вете миллиартт цалковай республикань предпринимательхнень сяда лац и аф пелезь тевснон вятеманкса. Кда ингольдень кизотнень инвестиционнай займась ульсь 5 миллиотт цалковайти молемс, тяни тя цифрась касфтови котонь-крда и кармай 30 миллион цалковай. Кодамот условиятне? Васендакиге предпринимательхненди эряви панчсемс рабочай од вастт, касфтомс производственнай мощносттнень, рамсемс тяниень пингонь оборудования. Эрь предпринимательти, кона максы заявка субсидиянь получаманкса, тяда инголе аноклама бизнес-план, бухгалтерскяй отчётность, што сон пингонь ётазь анок мрдафтомс сявф суммать, аньцек эста заявкац сявови мяльс. Поручителькс кармай Мордовия Республикань коммерческяй организациятнень ширень кирдемаснон коряс гарантийнай фондсь.
—2022 кизось Мордовия Республикаса лемтьф предпринимательскяй инициативань кизокс,—мярьгсь Алексей Грибанов.—Март ковть песта ётафтови Мордовиянь Оцюнять Артём Здуновонь мархта васедема, коса кармай оцю корхтама республикань предпринимательхнень и марнек бизнесть вандыень шинц колга, кодама тефт тиемат, штоба кемокстамс экономикать, сяда цебярьгофтомс ломаттнень эряфснон, сяськомс инголенк васьфневи прябалатнень.
Н.ЛОБАНОВ.