Эрь кизоня мокшень и эрзянь кялень Всероссийскяй шить карша ётафневи «Мокшень и эрзянь кяльса диктант» Всероссийскяй образовательнай акциясь. Тядде сон ульсь 15 апрельста Саранск ошса, Мордовиянь муниципальнай сембе райоттнень, а стане жа Россиянь ламоц региоттнень эса, коса компактнайста эряйхть мокшэрзятне.
Тя кизоня акциясь ётафтовсь кафксоцеда. Сонь аноклазе и ётафтозе Финно-угорскяй народонь культурань Поволжскяй центрась МР-нь Культурань, национальнай политикань и архивнай тевонь министерствать ширень кирдеманц вельде. Акциять целец—максомс возможность сембонди, кинь мялец, проверямс родной (мокшень и эрзянь) кяльснон коряс содамошиснон, касфтомс кяльхнень, национальнай культурать лангс мялень шарфтомать.
Тядде акциянь участникне сёрмадсть Мордовия Республикань Народнай писательть Валентина Мишанинать «Пингонь ортат» повестенц эзда пакш, коса сембоц ульсь 218 вал.
Саранскяйса акциять ётафтоманкса панжада площадкакс ульсь Н.П.Огарёвонь лемса МГУ-нь филологическяй факультетсь. Мокшень кяльса диктантонь сёрмадома пуромкшнесь нильгемоньшка ломань: учительхть, идень садонь воспитательхть, вузонь и колледжень студентт. Кеняртьфти, мес сёрмадыхнень ёткса ламоль од ломаньда.
Мокшень кяльса «Пингонь ортат» повестьста пакшть лувозе филологическяй наукань докторсь, Н.П.Огарёвонь лемса МГУ-нь филологическяй факультетонь мокшэрзянь кялень кафедрань профессорсь Галина Софроновна Иванова.
Диктантть ушедомда инголе пуромфненди пара валхт азсь мокшэрзянь кялень кафедрать заведующаец Мария Захаровна Лёвина.
—Кяльсь—тя минь оцюдонга оцю козяшиньке, сяс сон эряви лац содамс, аф пелезь-виздезь корхтамс и кородозь ванфтомс, штоба пачфтемс сонь од поколениятненди,—мярьгсь Мария Захаровна. Сон арьсесь сембонди сёрмадомс диктантть аньцек «ветес».
Мордовияса и Россиянь лия региоттнень эса акциянь ётафтома вастокс арсесть школатне, библиотекатне, образованиянь и культурань лия учреждениятне. Эряви азомс, што кизоста кизос мокшень и эрзянь кяльса диктантонь сёрмадыхнень лувкссна касонды.
Кода фалу, результаттне азовихть Финно-угорскяй народонь культурань Поволжскяй центрать сайтсонза. Сембе участникненди максовихть оценка мархта сертификатт. Инксост пшкядема Поволжскяй центрав.
Ольга ЕВДОКИМОВА.