Кельгсазь мокшэрзянь крайсонк гармониять. Сонь морамац кепсесы мяльцень, токсесы седицень, максси од вийхть, эрьгя. Вов мес республикасонк эрь кизоня «Морак, гармония!» фестивальса-конкурсса участвовандай тняра ломань. Тяфта ульсь тяддевок. Фестивальть-конкурсть отборочнай этапонзон эса примась участия колма сятта лама ломань.
6 апрельста Мордовиять сембе уженянзон эзда инь асу гармонисттне, ансамбльхне, сиде моронянь морайхне пуромкшнесть «Морак, гармония!» Народнай творчествань республиканскяй пялькстомать Гала-концертозонза. Аф ваномок сюнера шить лангс, фестивальть финалоц удалась сембе ширде. Тядде сон лемтьфоль Семьянь кизоти.
Гала-концертть ушедомда инголе, Культурань республиканскяй Дворецть фойесонза пуромкшнесть музыканттне и ваныхне. Гармонисттне маштозь люпшнезь гармониянь пунятнень, а инжихне морасть и кштисть народнай инструментть коряс. Пуромкссь арась эсь лацонь илакс республикань эряйхненди. Залса, кода корхнихть, марьти ашель коза прамс, сембе васттне заняфтольхть.
—Касфни мяль, мес вов ни комсь киза фестивальсь пуропнесыне республикань сембода цебярь гармонисттнень. Синь казендихть тейнек пара мяльхть-арьсемат, лезнихть юкснемс эряфонь стакатнень-сталмотнень колга. Мялезе спасибамс организаторхненди, велень Культурань кудонь руководительхненди и покодихненди эсь тевснонды преданнайкс улеманкса,—приветствовандазень Гала-концертонь участникнень и инжихнень МР-нь культурань, национальнай политикань и архивнай тевонь министрть васенце заместителец Александр Губанищев.
Сценать лангса тя шиня кайгсть мокшень, эрзянь, рузонь морот, сиде моронят, наигрышт, эряфть, кельгомать, войнать, шачема-касома уженять цебярь ширензон, тяниень пингонь прябалатнень колга инструментальнай композицият. Артисттне морасть лама патриотическяй мора. Ваныхнень ашесть кирдев сельмоведьсна моротнень кулхцондомста, конат лемтьфтольхть сятненди, кит тяниень пингть передовойсот.
Ламотненди «Морак, гармониясь!» тядде ульсь аф васенцесь. Вов ни мзяроцеда эсонза примайхть участия содаф гармонисттне—Темникавста Геннадий Уткин, Саранскяйста Николай Оськин, Торбееваста Алексей Макаев, Зубово-Полянскяй районцта Вячеслав Криволапов и лиятне.
Тядде фестивальса-конкурсса участвовандась аф кржа семейнай коллектив. Фкясь синь ёткстост Атерьста Чепайкиттнень музыкальнай семьясна. Мирттне-рьвятне Иван Васильевич и Елена Алексеевна касфтыхть вете шабат. Сембе синь морайхть музыкальнай инструментса: кие—гармонияса, кие—балалайкаса, кие—бубенца, кие—куцюса. Гармонияса маштозь морай и сонць кудазоравась, Елена Алексеевна. Чепайкиттнень семьяснон выступленияц Гала-концертса васьфтьфоль кядень кайги цяпамаса.
Аш кода аф лятфтамс Кадошкинскяй районцта браттнень-кафтасьнень Юрий и Владимир Келиттнень. Гармониять мархта синь ялгат ёт шабакс. Васенцекс музыкати сась Юрий. Ичкоздень 1991 кизоня фильмань ваномста сон кульсь мора, кона токазе седиенц и сась мяльс тонадомс морамс сонь.
—90-це кизотне стакатольхть. Дуганозень мархта кочксеме сюлекат, штоба меле ярмакть лангс рамамс гармошка. Мархтонза молень музыкань учителезти Николай Васильевич Шичкинонди и эняльдень тонафтомс монь морама,—лятфнесы Юрий Келин.
Пингонь ётазь Володявок шарфтсь мяль гармонияти. Браттне ушедсть выступандакшнема школьнай, меле районнай мероприятиятнень эса, а сяльде лиссть республиканскяй уровеньц. Тяни кафцьке морсихть «Мокшень алят» эстраднай коллективса. Келиттне няфнесазь маштомошиснон лама конкурсса, коса занцихть призовой вастт. Маластонь пингть браттне срхкайхть СВО-нь ётафтома васттненди, штоба кеняртьфтемс боецнень морамаснон мархта.
Кода няевсь пялькстомать пингста, народнай инструментсь кельгови аф аньцек эряфкшуфненди, но и оттненди и шабатненди. Сценать лангс лисихнень ёткса ламоль идьта.
Сяськихне казьфтольхть башка номинациява: «Гармониять коряс моронь, сиде моронянь морай», «2024 кизонь инь творческяй семьясь», «Гармонист-аккомпаниатор», «Морай гармонист», «Гармонист-любитель» и стак тов. А Гран-прить тядде сатозе Зубово-Полянскяй районцта од гармонистсь Прохор Рапин. Койс коре сяськити казьфоль тульскяй гармония.
Ольга ЕВДОКИМОВА.
Фототне Николай КАРАНОВОНЬ.