А мон арьсень,што ломанць цебярян

Церькавса мольсь ёткшинь илядень службась. Ломаньда аф пяк ламоль. Фкя алясь, кона ашезь нолне фкявок служба и эрь недляшиня прьхчещандафнесь пря, маладсь священникти.
—Мезьса каендат?—кизефтезе батюшкась.
Алясь аф ламос арьсезевсь и мярьгсь:
—Тон содасак, бта шарьхкодьса, што ломаттне грешнайхть, но эсь мельган кодамовок пеже аф марян. Пади, и тиень кодамовок кальдяв, но аф лятфтаса. Тя, улема, пяк кальдяв, но кода тейне улемс?
—Кулхцондомак, эрь тисаськ вов кода,—мярьгсь батюшкась.—Тон тячи аф кармат споведондафтома, кадсаськ вандыти, а тейть максан аф оцю тевня. Кагодонь лопаня лангс сёрмадыть ся кальдяв тефнень, конань тон тиить недяляньберьф. Васенда кизефтить шабатнень, меле гайфтть тядятненди-алятненди, а кда нинге ули мяльце, тяка жа кизефксть макск ялгатненди, конатнень мархта работат, и мала ломаттненди. Азк теест, штоба отвечальхть видеста и што тон аф обжават лангозост.
Алясь дивандазевсь, но сась мяльс тиемс семботь, мезе азсь батюшкась.
Омбоце шиня сон сась споведондафтома и таргазе сёрматф каготканц.
—Батюшка, тон афи содасак, мзяра кулень исяк эсь колган. И вдь сембось, мезе азондсть колган, афкукс тяфта. А мон ашине шарьхкотькшне, што тя кальдяв. Работама вастсовок ламотнень обжсине и валса, и тевса. А кда азомс видеста, эсь прязень лувондыне цебярь ломанькс. Тейне визькс, мес нинге исяк арьсень, што мон пяк лац вятьса прязень и цебярь ломанян.
Священниксь пеедезевсь, вельхтязе епитрахильса алять прянц и ушедсь тяштьфонц лувома.
Николай.