Троице-Сергиева лаврась—сетьмошинь васта

Весть кода-бди лятфтайне ся шитнень, мзярда мон бабазень и патязень мархта якаме Троице-Сергиева лаврав. Улендеме тоса аф весть, но фкя арнеманьке лядсь мялямозон тячемс.
Май ковонь шитнень студенттне анокласть кизонь сессияти. Бабазе корхтамазь минь, штоба молелеме Троице-Сергиева лаврав и озондолеме экзаменда инголе. Патязти эста ульсь 20 киза, сон тонафнесь вузса, а тейне—17, мон аньцек срхкань поступама институту. Прясон ульсь тундась, весялготкшнематне. Кодама паломничествань колга арьсемат?
Но бабазе сяка корхтамазь. Штоба минь молелеме Лаврав, сон мярьгсь сявомс минь трапезнаи. Тя ульсь кардаф приём!
Кие улендсь Лавраса, ся содасы, кодама танцти ярхцамбяль мишендеви монастырень кафеса. А кодама какао эста мишендсть—ёфси ёфкс!
Мяляфтса, Лаврав минь ардоме рана шобдава электричкаса. Ломаньда пяк ламоль. И монь весяла патязе апак учсек арьсесь аф ламода пеетькшнемс—ушедсь морама. Сонь пяк цебярель вайгялец, сяс патязе аф морась, а юватькшнесь. Виде, бабазе сонь курокста сетьмофтезе. Ломаттне морайти стане жа ашесть кенярде, сяс мес сембонди эрявсь аф ламода удомс. Мзярда патязе сетьмось, сон кяжиста мярьгсь:
—Мон вдь ломаттненди ёрань цебярь тиемс, морань питнефтома.
Пачкодеме Сергиев Посаду, сяльде—Лаврав. Минь патязень мархта шарфтоме трапезнайть шири, а бабазе ювадсь мельганк.
—Тон вдь мярьготь сявомс минь трапезнаи,—мярьгонь мон.
—Васенда эряви сюконямс преподобнайть мощанзонды,—азозе бабазе.—А сяльде ни ули кода молемс трапезнаи или коза мяльце.
Троицкяй храму, косотольхть преподобнай Сергиень мощанза, ульсь ни кувака очередь. Араме, учтама. Очередсь шаштсь пяк савор. Мзярда суваме храму, тоса морафтсть акафист. Мзярс кулхцондоме, патязе матодовсь стяда ащезь, а мон цють ашине веляфта штатолонь путомкать.
Сяда меле, кода сюконяме мощатненди, потмосон стама кенярдема появась, што валсовок аф азови. А нинге эвондась надияма: кда ни саме Лаврав, сессияське максови тёждяста. Азомс видеста, патязе макссы сессиянц, а мон поступан вузу.
И вов тоса, трапезнайса, минь кочкаме ярхцамбяль, тяконь лувксса пяряка мархта какао. Озаме уженяв и ярхцаме стане, бта кизошка мезьдовок ашеме поре.
Екатерина.