Ушедсь Великай постсь

Ушедсь Великай постсь. Православнай ламоц христиаттне кирдьсазь сонь и тияк аноклайхть Очижити. Содаф, тя постсь—инь кувакась и строгайсь лиятнень ёткста. Аф эрь ломанти сон кирдеви кода физическяй, стане и психологическяй ширде. Минь корреспондентоньке васетькшнесь Саранскяень Епархиять секретаренц, протоиерейть Виктор Хохловонь мархта, кона отвечась сонь кизефксонзон лангс.
—Отец Виктор, мес Великай постсь ащи васенце вастса лиятнень ёткста?
—Сонь лемоц—Великай. Сисем недялят поставатама, учемок оцю илать—Христость Вельмаманц. Постсь строгай, эряви кирдемс сонь, кой-коста аш кода нолямс тевс нльне постнай вайтьке. Кда кинь-бди улихть шумбрашить мархта прябаланза, тянкса анама бславама церькавса.
—Постсь аф тёждя, аф сембонди кирдеви. Кодама совет максолеть сятненди, кит ушедсть сонь кирдемонза.
—Постта инголе валомне атказама сивольть эзда. Постонь каршень недяляня сивольда аф ярхцайхть ни, но лофцонь ярхцамбяльхненди кардама аш. Тя недяляти мярьгихть Масланця.
Тя пингть анама бславама, корхнема священникть мархта, азондома шумбрашицень колга. Аф эряви эстейть макссемс разрешения, кепотьксонди, ярхцамс сивольда или лия скоромнай ярхцамбяльда, сяс мес мяльце тянь тиемс. Эряви содамс, што постсь арьсеф цебярть, сетьмомать инкса.
—Корхтави: «Постсь аф аньцек пекса, но и пряса».
—Виде. Васенце вастса ащи духовностсь. Постсь—тя аф аньцек ярхцамбяльть эзда атказама. Вов, кепотьксонди, тонадоме телевизорти. Сон фалу работай, мзярда тиенттяма кудонь тефт, ваймосетяма и стак тов.
Постста якама церькаву, сяда сиденяста прьхчещандафнема пря. Тиема семботь, штоба арамс сяда малакс церькавти и Шкайти.
—А кода арамс сяда малакс Шкайти?
—Озондома, морафнема молитват шобдава и илять. Лувондома Евангелиять, Псалтырть и православнай лия книгат. Ламотне путнихть эстеест цель—лувомс Библиять, Сире и Од Соткснень. Арьсян, ня книгатнень ули кода морафтомс тя пингть.
—Отец Виктор, азонтт, пожалняста, Страстной Седмицать колга.
—Сон аф сувси Великай Постти (но моли мархтонза). Мельганза кармай Очижись. Васенце колма шитнень ётафтови преждеосвященнай Дархненди богослужениясь. Великай шуваланяста и Великай ёткшиста ётафневи Василий Великаень Литургияц. Великай пяденцяста, мзярда ульсь Христость распятияц, Литургия аф кармай.
—Мезе арьсят лувиеньконди?
—Великай постста мялезе арьсемс вийхть, сетьмома и Шкайть лезксонц. Арьседа эсь тевонтень колга, шарфтода мяль Шкайти, ляткшнеда ляпе седи ломанькс. Пингсь тяни аф тёждя. Уленди, фкя-фкянь лангс кяжиякшнетяма, казямготкшнетяма. Ванода семботь лангс кельгома мархта!
—Спасиба!
Илья Первойкин.