Эрь мезне приметнеса, што районцонк эряйхть аф озадонь седихть ащекшни ломатть, конат кельгсазь эсь ёмла родинаснон. Кеняртьфти, што тячи церькафне стройсевихть аф аньцек ошнень эса, но и петневихть-тиендевихть велева. Тяфта и Сузгярьгса ушедовсь 200 кизонь православнай святынять эреклафтомац, конань великай историяц и козя ётай пингоц.
Сузгярьгсь—Рузаевскяй райононь инь мазы велетнень ёткста фкясь. Сон ащи Рузаевкать эзда сисем вайгяльбень вастса Виляйка ляйть лангса. Пуроптф XVII векста. Тя сельмованфонь салай уженя, коса синць эряйхне лама тиендихть сонь панчфокс панжеманксонза.
Сузгарьевскяй велень поселениять территорияса лац работай республикань фкя инь оцю и высокоэффективнай предприятиясь—«Агро К-С» ООО-сь. Вов ни 40 киза руководителькс хозяйствати ащи опытнай и грамотнай аграрийсь, МР-нь велень хозяйствань Заслуженнай работниксь и Рузаевкань Почётнай гражданинць Николай Амбаев. Предприятиясь фалу лезни велень территориять петемаса-мазоптомаса, вельденза эряфс ётафневихть од проектт, петневихть китне, тиендеви ремонт социальнай назначениянь ташта зданиятненди.
Кизоста кизос Сузгярьгсь полафнесы шамаликонц. Мордовиянь Оцюнять Артём Здуновонь, Рузаевскяй райононь оцюнять Александр Юткинонь ширень кирдемаснон вельде тяса тевс сувафневихть од проектт.
Афкукс, Сузгярьгсь пяк мазы и петьф-тиф васта. Но велеть кучкаса ащи сембе велеряйхнень сярятьфсна—тя кафта этажса палф зданиясь, конань великай историяц. Тяда инголе тя ульсь Святительть Николай Чудотворецонь храмоц. Сон строяфоль 1793 кизоня, одукс строяфоль—1863 кизоня. Штоба якстерь кирпицьста тиф стенатне улельхть сяда кемот, известковай шоряфксти кайсельхть алхт. Храмть видеса работась церковно-приходской школа.
Церькавсь строяфоль вете купол мархта, кода Пайгармскяй Параскево-Вознесенскяй авань монастырть Успенскяй и Вознесенскяй соборонза. Иконостассь пачфтьфоль Свято-Троицкяй Чуфаровскяй алянь монастырьста.
Ётай веконь 1930 кизотнень атеисттне розарязь Сузгярьгонь храмть. Срафтозь-калафтозь куполхнень, ёрдазь модать лангс лама пудонь сталмоса пайгть, кона пезсь пяле метрань крхкалмос, салсезь церькавонь паршихнень, иконостасть. Сембось лихтьфоль-салафоль храмста прихожаттнень эзда сёпозь-кяшезь.
Срафтф-калафтф церькавсь ащесь шавоста пцтай 30 киза. Великай Отечественнай войнать пингста сонь нолязь тевс складской помещения лаца—васенда тяса ванфтовсь сёра, сяльде—удобреният.
XX-це веконь 50-це кизотнень кучкаста райисполкомсь примась решения тиемс зданияти реконструкция. Сонь тага ушедсть срафнемонза (стенатнень стакаль калафтомс нльне ломсовок), штоба тиемс эздонза школа. Эсь тевснон строительхне пяшкодезь. 12 кизода меле, 1966 кизоня, храмсь тифоль кафта этажса средняй общеобразовательнай школанди. 34 киза архитектурань тя мазыдонга мазы памятникса, коса ичкоздень ётай пингста вятневсть литургият, кайгозевсь аф пайгонь, а школьнай циннямась. Тяконь лувксса и тейневок. Тняра кизоста тяста нолдафоль пцтай 1000 выпускник.
2000 кизоня тонафнень 9-це класса. 26 ноябрьста велеса лиссь оцю пожар. Электропроводкать эзда крьвязсь кельгома школаньке. Пяк лац мяляфтса ся кельме веть. Минь эряме аф ичкозе школать эзда. Дуганозень мархта сргоземе пожарнай машинатнень сиренаснон эзда. Лисемок кудста, няеме пелькс картина: школать марнек вельхксоц фатяфоль толса. Спецтехникась сась курокста, несколька бригада ульсь мянь Саранскяйста. Машинатне ашесть кенерькшне сявондемс тястонь прудста ведь, штоба матомс толть.
Пожарнайхне работасть аф пелезь, ужяленди, кафттне пидевсть и токавсть, прамок зданиять омбоце этажстонза. Пожарс пуромкшнесть пцтай сембе велеряйхне—однек-сиренек. Ломаттне ащесть школать инголе и авардсть: вдь сельминголенк палсь минь омбоце кудоньке! Тя пингс пелькс лятфнемс тянь колга. Вельхксть эзда толсь ётась омбоце этажти, а сяльде и васенцети. Сон арсесь коль сяда и сяда виикс, а надиямада, што зданиять удалай араламс, лядондсь коль сяда кржа. Корхтайхть, што кой-кона аф пели ломаттне кенерсть сувамс учительскяи и лихтемс тоста педагокнень тевснон и тонафнихнень оценкаснон мархта журналхнень.
Пожарсь гастязень сембе кабинеттнень, спортзалть, библиотекать. Школьнай инвентарть араламс ашезь удала. Аньцек толсь сетьмось, кемотть ломанць сувасть палф вастти, ванондомок коцай зданиять сембе уженянзон. Мезевок ашезь ванфтов. Тя пингть эвотьф и ризнай велеряйхне кульсть авань вайгяль: «Сада тяза!» Сон пачфтезень ся вастти, коса тяда инголе ульсь географиянь кабинетсь. Перьфпяле сембось равжель. Но авать, кона тердсь тяза, сельмованфоц пиндолдсь! Сузгярьгонь эряйхне ашесть верондав няйфти: ужеса ащесь толть мархта апак токак Библия, вакссонза—Российскяй Федерациять картац. Тя ульсь афкуксонь чудакс! Толонь кяльхне, конат мезевок ашесть ужяльде эсь кисост, ётасть Библиять и картать вакска, кадомок синь лятфнембяленди сай поколениятненди. «Шкабаваз! Тяйть када шабаньконь школафтома, лезтт теест»—озондсь кие-бди. Няйфта меле ломаттне тушендсть кудга колаф мяльса и надияма мархта.
Недяля шабатне ащесть кудса. Сяльде примафоль решения—начальнай классне кармайхть тонафнема кафта сменаса велень Советть ингольдень зданиясонза, кона ащесь аф ичкозе палф школать эзда. А 5-11-це классне кармайхть пачфневома Ключарева вели. Тоса тейнек аноклафоль велень школать марнек омбоце этажец.
«Ключ-Сузгарьевский» СПК-ть (тяни «Агро К-С» ООО-сь) директороц Николай Амбаев, ламос апак арьсек, лиссь инициатива мархта строямс од школа хозяйствать средстванзон лангс. Проектть коряс питнец ульсь 4 миллиотт цалковай. Строямась срхкафтовсь, но ярмакне ушедсть аф сатнема. Лезксонкса пшкятьфоль республикань руководствати. Сафоль мяльс строямс аф ошеннеда кальдяв школа. Од проектть питнец арась 14 миллион цалковай! Васенда арьсекшневсь, што пяленц пандсы МР-нь Правительствась, омбоцеть—велень хозяйствась. Сяда тов пцтай сембе карьхцнень сявозень эсь лангозонза региононь Правительствась.
Школась строяфоль 1,5 кизоста и лиссь пяк удалафста. Сон торжественнайста панчфоль 2022 кизоня. Тяза мон сань тонафнема 11-це классу и кизода меле арань од школань васенце выпускницакс.
А мезе ина церькавть мархта? Велесь эрясь храмфтома 1998 кизоть самс, пцтай кодгемонь киза. Но аф религияфтома. Велеряйхне тисть озондомань куд. Мария Ивановна Кондратьева пара мяльса максозе эсь кудонц и павазуволь няемс ширесонза озонды ломаттнень, сядонга пяк шабатнень. Марстонь вийса рамафтольхть церькавонь кой-кодама паршихть, молитвенникт, тертьфоль священник. Тевсь бта тусь. Велеряйхне пара мяльса тиендсть пожертвованият причастиянди, кстиндаманди, венцяманди эрявиксонь рамаманкса. Но прихожаттне, да и синць озондомань кудонь инициаторхне шарьхкотькшнезь, што тя сембось аф ся, мезе эряви. Эста «Ключ-Сузгарьевский» СПК-ть директороц Николай Амбаев тага венептезе лездыень кяденц. Николай Борисович шарьхкотькшнезе, што тяшка оцю велети аш кода улемс храмфтома. Сафоль мяльс строямс сонь велеть кучкаса.
Сиземань апак содак трудендасть каменщикне, шуфтста керсихне, малярхне, шарьхкотькшнемок, што тиендихть путкс святой тевс. Тястонь скульпторсь Владимир Сараев керозе шуфтста крёзть лангс шавф Иисусть ронгонц. Ламоц велеряйхне маласькофнезь храмть строяманц шумордаманц эсь пожертвованияснон мархта.
И вов, марстонь вийхнень вельде, ащи велеть кучкаса Святительть Николай Чудотворецонь лемса мазы церькавсь. Тяса кармасть ётафневома илядень и шобдавань литургият, конатнень мольфтьсыне священниксь, отец Виталий Гришенькин. Тячемс Сузгярьгонь ломаттне спасибайхть Николай Амбаевонди озондомань тя кудть инкса.
Кафта кизода тяда инголе церькавсь петьфоль. Приходть ярмаконзон лангс одкстоптфоль алтарсь (400 тёжянь цалковай), а «Агро К-С» ООО-ть средстванзон лангс (600 тёжянь цалковай) архтфтольхть фасадсь и перяфкссь, ацафоль тратуарнай плитка.
Да, кизоста кизос Сузгярьгсь полафни-мазомкшни, стройсевихть од кутт, ошнень эзда вели мртцихть ломаттне. «Комплексное развитие сельских территорий» программать вельде школать ваксса ладяфтольхть налхксемань и спортивнай площадкат.
Но фкя общественнай территориясь ашезь сатне Сузгярьгти. Николай Амбаев макссь финансовай лезкс нинге фкя площадкань строяманкса, кона мусь васта церькавть (палф школать) ваксса. Велеряйхне пяк таколдыхть, што святынясь ащи срафтфста-калафтфста. И вов аф кунара тястонь эряйхне састь мяльс марстонь вийса ванфтомс историческяй наследиять и эреклафтомс православнай святынять—Николай Чудотворецонь храмонц. Синь мяльснон ширенц кирдезе Николай Амбаев.
—Тя культураньконь и историяньконь объектоц. А историясь эряви ванфнемс и мяляфтомс. Тейнек удалась мумс нинге апак срафтт церькавть фотографиянц. Койсон, зданиясь эряви тиемс стамокс, кодамокс сон ульсь,—мярьгсь Николай Амбаев.
2023 кизонь декабрть песта объектса ётафтфоль проектно-сметнай документациянь аноклай сотрудникнень рабочай васедемасна. Эсонза примасть участия «Геостройпроект» ООО-ть директороц В.А.Большаков, главнай инженерсь С.М.Нежданов, экспертсь и техническяй наукань докторсь, профессорсь, архитектурань историксь В.Б.Махаев, а стане жа Сузгарьевскяй велень поселениянь администрациянь оцюнясь Геннадий Кажаев и «Агро К-С» ООО-ть директороц Николай Амбаев.
Тяниень пингти ётафтф ни оцю работа. Ингольдень храмть эзда ванфтовсть аньцек стенатне. Техникать работаманкса сафоль мяльс ётафтомс газопроводть модать алга. Святынясь ароптфоль кархчнень эзда, сон аноклаф реставрациянь тиеманкса. Шумордама лангса проектно-сметнай документациять анокламац.
Получамок Николай Чудотворецонь церькавть настоятеленц Виталий Гришенькинонь бславаманц, озадонь седихть аф ащекшни лама ломань поладсь тя пара тевти. Тяниень пингть сембе работатне мольфтевихть велеряйхнень, «Агро К-С» ООО-нь руководствать и Сузгарьевскяй велень поселениянь администрациять вийснон и средстваснон вельде. Но тя аф сатомшка.
Конешна, штоба педа-пес петемс-тиемс тя эсь лацонь, историческяй козя ётай пинге мархта храмть эряви лама вийда и финансовай оцю карьхцьт.
—Озадонь седихть аф ащекшни эрь земляконьконди ули кода примамс участия тя пара тевса: строительнай материалса, рабочай вийса и ярмакса. Мялезе пшкядемс сембонди, кинди питни петеви-тиеви объектсь. Эняльттяма максомс хуш кодама финансовай лезкс ремонтнай работатнень пяшкодеманкса. Надиятама озадонь седихть аф ащекшни сембе ломаттнень, а стане жа земляконьконь, конат мзярда-бди тусть оцю ошу, лезксснон лангс. Пяк стака мумс эрявикс средстват, но велеряйхне аф нолясазь кядьснон. Эрьда марса тихтяма пара тев!—мярьгсь Сузгарьевскяй велень поселениянь оцюнясь Геннадий Кажаев.
—Россияса эряйхть ся велетне, коса ули храм. Кирнеса велеряеньконь и ёмла родинань патриотть Николай Амбаевонь смузю и виде решениянц ширенц. Минь карматама маряма гордость православнай святыняньконь инкса. Вдь тя великай история, а историяфтома, кода корхнихть, аш сай пинге!—поладозе Николай Кажаев.
—Советскяй Союзть пингста ульсть гонениять церькавть лангс. Тяни тя лоткафтовсь. Странань эряйхне тага шарфтсть Шкайти. Эряфкшуста минь сидеста сашенттама верати. Мяленьке, штоба сире пингонь храмть эреклафтоманц коряс сембе мяленьке пяшкодевольхть. Тя сембось ляды минь иденьконди, уноконьконди, идень уноконьконди. Эряви ванфтомс историческяй мялямть и кирдемс верать ширенц! Тя минь виеньконь духовнай вастоц!—мярьгсь трудонь ветеранць Николай Сараев.
Сембе минь, Сузгярьгонь эряйхне, пяк надиятама, што курок карматама ащема храмть инголе сельмоведь мархта аф ризфонкса, кода тя ульсь 2000 кизонь ноябрьста пожарть пингста, а павазонкса, мзярда православнай святынясь панчсыне кенкшензон марнек странань прихожаттненди. Тяса тага кармайхть ётафневома православнай службат. И пиндолгодыхть куполхне, валдоптомок марнек перьфпяльть. Районть келес кармай кулевома пайкнень шавомасна, кона терни верондамати. Чудас и Шкайти верондамати!
Надежда ПОДЛИПАЛИНА.