Мокшавась Елена Становкина колма кизот работай участковай врачекс-терапевтокс Ичалковскяй центральнай районнай больницяса. А сась сон тяза «Земский доктор» программать коряс. Кенерсь арамс эсь ломанькс, курокста мусь марстонь кяль работас коре ялганзон (ётксост стане жа улихть «Земский доктор» программать коряс покодихть), пациенттнень мархта. Кельгсазь Елена Петровнань Ичалкань эряйхне. Валсовок, кле, пчкафты, аф аньцек «медицинаса».
Самай тя «медицинати» мокшавась мольсь кемголмува киза. Шачемас коре Елена Становкина Старошайговскяй райононь Лемдяй мокшень велеста. Мала раднянзон ёткса врачт ашельхть. 9-це классть шумордамдонза меле эрявсь эстеенза максомс ответ кизефксть лангс: коза молемс тонафнема сяда тов? Арьсесь-тись мокшень стирсь и кочказе Саранскяень медицинскяй колледжть. Содазе, што ломанень пчкафнемать мархта тевсь веши крхка содамошит, эрь предметсь лац-ряц тонафнема. Тяфта сон и тись. Ниле кизот Елена Сыркина тонафнесь медицинскяй колледжса и шумордазе сонь «Сестринское дело» специальностьс коре. Но тянь лангс тонафнеманц ашезе шуморда, а поладозе Н.П.Огарёвонь лемса Мордовскяй государственнай университетонь Медицинскяй институтса. Мзярда теориясь и практикась фалу молихть кяденьбецек—тя пяк пара. Эста ломанть эзда лиси эсь тевонь содай специалист. Тянь Елена Петровна лац содазе, сяс Медицинскяй институту поступамдонза меле ушедсь работама 1№ идень республиканскяй больницянь анестезиологиянь и реанимациянь отделенияса медицинскяй сестракс.
Стака-аф ульсь фкя пингть работамс и тонафнемс? Тя кизефксть лангс участковай врачсь-терапевтсь Елена Становкина отвечась тяфта: «Аф шта пяк стака, но эрявсь фалу и сембе вастова кенеремс. Работаста эряскодомс институту, кой-коста—меколанкт».
Тяфта ётасть сисем кизот. Елена Петровна тонафнесь и работась (мезе стамсь реанимациясь, да нинге иденнесь—цебярьста содасы практикаса). Вузть аделамдонза меле кафта кизос поступась ординатурав терапиять коряс. Вов и макссь врачекс арамати кемголмува киза. Тонафнемась мзярдовок сонь ашезе эвфне, меколанкт, мялезонзоль.
Ординатураса тонафнемста Елена Сыркина лиссь рьвакс эсь велень мокшень цёрати Никита Становкинонди. Тяфта и «шачсь» нинге фкя од семья.
Никита Александровичень кучезь работама Ичалкав. Шарьхкотьф, мельганза срхкась и рьвацка. Тевсоль ни «Земский доктор» программась, конань коряс Елена Петровна ушедсь работама Ичалковскяй центральнай районнай больницяса участковай врачекс-терапевтокс.
«Тя ульсь 2021 кизоня. Самай «азорондась» пандемиясь, сяс работань аф аньцек поликлиникаса, но и якстерь зонаса. Эрь шиня примсень пяк лама пациент»,—лятфни мокшавась.
Ичалкаса Становкиттне сиводсть квартира, коса эряйхть тянемс. Семьянь азорсь, Никита Александрович—следователь. Шумордазе Н.П.Огарёвонь лемса Мордовскяй государственнай университетонь юридическяй факультетть. кафта кизот служась армияса.
Мирттне-рьвятне кафцьке Лемдяень. Мяльсна улендемс ёмла родинасост сяда сидеста, но аф фалу тя удалси, сяс мес кой-коста синь—врачсь и следовательсь ваймама шистовок дежуряйхть.
Мокшавась макссь совет ся од ломаттненди, конат ёрайхть сотомс эряфснон врачень тевть мархта: «Аф эряви пелемс стакада-сталмода, эста тевонтевок лац ладявихть. Сидеста лятфнеса эсь прязень. Васенда ульсь медицинскяй колледжсь, сяда тов—Медицинскяй институтсь и идень больницяса работамась. Меле—ординатурась. Тяфта, аськолямок сембе куцеманятнень, арань врачекс-терапевтокс и вестевок ашень каенда, што кочкайне тя тевть».
Тияк Елена Петровна шарфтсь мяль, што, аф ваномок получаф дипломть и шумордаф ординатурать лангс, афкуксонь врачти тонафнема эряфоньберьф. И маштома ломаттнень мархта марстонь кялень вешема, улема теест сяда малакс.
Татьяна Альшина.