Здравоохранениянь региональнай сферать работанцты итокт тифтольхть 27 февральста ведомствать итоговай коллегиясонза. Эсонза примась участия Мордовиянь Оцюнясь Артём Здунов.
Отраслять работань основной показателензон колга азондсь МР-нь здравоохранениянь министрсь Олег Маркин.
2023 кизонь итокнень коряс Мордовиясь занцесы омбоце вастть ПФО-са и 17 вастть Россияса эряфть кувалмонц средняй показателенц сатоманц коряс—сон арась 74 киза. 2030 кизоти регионти сави сатомс целевой значениять—пцтай 78 киза.
Ужяленди, республикаса ванфневи одс шачихнень лувксснон коряс аф простой ситуациясь—мекольдень вете кизоста сон кирсь пцтай 26 процентта. Тяка пингть кой-кодама мератнень эряфс ётафтозь удалась кирьфтамс аборттнень лувксснон 46 процентта.
Одс шачихнень лувксснон касфтоманц мяльса кирдезь васенце вастти лихневи репродуктивнай шумбрашись. 2024 кизоня Мордовияса васенцеда ётафтови населениять репродуктивнай шумбрашинц оценканц коряс диспансеризация. Сон фатяй 148 тёжянь ломань.
Меля республикаса удалась кирьфтамс кулсематнень и колма кизоста васенцеда сатомс ковидта ингольдень уровенть. Именна 2019 кизоня сон ульсь инь ёмлакс регионца мекольдень 10 кизоста.
Стабильнай эпидобстановкать ванфтоманкса башка мяль шарфневи вакцинацияти.
Здравоохранениянь марнек системать юроц—первичнай медико-санитарнай лезкссь. Мордовиясь отмечаф федеральнай уровеньца здравоохранениянь первичнай звенать одкстоптоманц коряс программать лац эряфс ётафтоманкса. Мекольдень вете кизотнень районнай больницятненди поступась 429 единица оборудования, врачнень и фельдшерхнень сярядихненди пачфнеманкса 36 автомобиль, курокстонь лезксонь 59 автомобиль, строяфт 77 фельдшерско-акушерскяй пункт и 3 врачебнай амбулаторият, петьф-тиф 10-да лама ФАП.
Целайнек республикань здравоохранениянь системати меля нолдафоль 9 миллиартта лама цалковай, тядде арьсешкневи максомс тняра жа. Льготнай лекарственнай обеспечениянди нолдаф 2 миллиартта лама цалковай. Республикань руководствать мархта примаф сахарнай диабетса сяряди шабатнень пчкафтоманкса финансированиянь максомать колга решения. Тянкса республиканскяй бюджетста кафта кизоста нолдаф 94 миллионда лама цалковай.
Вете кизоста, мзярс ётафневи эряфс «Здравоохранение» национальнай проектсь, финансированиянь аф фкя лацонь источникнень эзда нолдафоль 14 миллиартта лама цалковай: тевс сувафтфт Республиканскяй онкологическяй диспансерть поликлиникац, Идень РКБ-ть хирургическяй корпусоц, Рузаевкаса идень поликлиникась. Рамаф 750 единица оборудования. Нацпроектть коряс работась мольфтеви сяда тов.
Башка работа здравоохранениянь сфераса мольфтеви СВО-нь участникнень и синь семьянь членцнон реабилитацияснон коряс. Мордовиянь медикне активнайста работайхть Херсонскяй областень Каланчакскяй округса—тоса ульсть ни медиконь кота бригаданьке.
Обязательнай медицинскяй страхованиянь Территориальнай фондть работанцты итокт тись фондть директороц Владимир Каргаев.
Мордовиянь Оцюнясь, итогонь тиемста, мярьгсь: и медицинась, и сембе службатне, и региональнай Правительствась кармайхть работама сянкса, штоба решандамс демографическяй прябалатнень: «Конешна, тейнек эряви нолдамс тевс сембе ресурснень шумбрашить ванфтоманкса, васендакиге, аватнень и алятнень репродуктивнай шумбрашиснон».
Региононь руководительсь стане жа шарфтсь мяль, што эряви рамамс вастста вастс усксеви медицинскяй комплекст выездной медосмотрань ётафнеманкса. Минь задачаньке, кле, обеспечендамс республикань эряйхнень качественнай диагностикаса и эсь пингонь пчкафнемаса.
Маластонь кизотненди здравоохранениянь региональнай системать инголе путневи задачатнень ёткста Артём Здунов азозень: Республиканскяй онкологическяй диспансерть реконструкциянц, Веронь службать одкстоптоманц, отраслять цифровизациянц, Единай централизованнай информационнай системати ётамать, кадровай обеспечениять и стак тов.
Коллегиять шумордамста республикань Оцюнясь макссь государственнай казнет Мордовиянь медикненди эсь прянь аф ужяльдезь работаманкса.