22 январьста Мордовиянь Оцюнясь Артём Здунов ульсь Рузаевка аймакса. Районца сон васендакиге ванозе центральнай больницять—тяса панжевсь идень од поликлиника. Учреждениять тяда ингольдень зданияц ашезь отвеча тяниень пингонь вешфксненди. 2020 кизоня региононь руководительсь примась решения строямс од здания.
Эряви азомс, Рузаевскяй районнай больницясь—районца фкя и тяка учреждениясь, кона обслуживандасыне иттнень и подросткатнень. А тя аф лама, аф кржа 10 тёжяньда лама ломань.
Строительнай тефненди кярьмотьфоль 2022 кизоня. Синь мольфтевсть «Здравоохранение» национальнай проектть мяльса кирдезь. Сембе уровенень бюджеттнень эзда нолдафоль 540 миллионда лама цалковай: 100 миллионть малава цалковайсь карьхцяфоль медицинскяй оборудованиянди, мебеленди и оргтехниканди.
Од поликлиникати ули кода примамс фкя сменаста 350 ломань. Тяниень пингонь оборудованияса козякофтфт УЗИ-нь, эндоскопиянь и рентгенографиянь кабинеттне. Тяса ули сембе эрявикссь курокста диагностикань тиеманкса, лабораторно-инструментальнай обследованиянь ётафтоманкса. Васенцеда Рузаевкань идень поликлиникаса эвондась атнай шабанянь андомань комната.
Артём Здунов ванозень кой-кона специалисттнень кабинетснон, а стане жа процедурнайть и макссь оценка работамань условиятненди. Няйфсь кеподезе мяленц.
Колмогемонь киза стаж мархта врачсь-отолорингологсь Любовь Рябова виденцясь, кле, афи арьсекшнень, што сави работамс тяфтама цебярьдонга цебярь условияса. Валонзон поладозь врачсь-урологсь Алексей Карнаухов и диагностическяй отделениять заведующаец Ольга Лапшина.
Нльне коридорхне од поликлиникаса шарфтыхть эсь лангозост мяль. Мзярс моли очередсь, налхксемань зонаса иттненди ули мезьса занямс пря. Артём Здунов шарфтсь мяль, што обстановкась ёфси аф больницянне, помещениятнень дизайнасна салай сельмованф. Сон пшкядсь налхкси шабатненди и казсь теест ламбама казнет: «Тяса пара, но сидеста улендемс тя «кудса» аф эряви. Тяда сярятькшне!»
Сяда тов Мордовиянь Оцюнясь ульсь Красное Сельцо посёлкаса. «Комплексное развитие сельских территорий» госпрограммать вельде тяса строяф Культурань куд. ДК-нь ташта зданиясь ульсь аварийнай и сонь савсь срафтомс. Тяка пингть, эряйхне эняльтькшнесть тиемс посёлкаса творчестванди и культурнайста пингть ётафнеманкса условият. Пшкятькшнесть и лична Мордовиянь Оцюняти. Региононь руководительсь лездсь.
Подрядчиксь «Стройэнергокомплект» ООО-сь кярьмодсь работати ётай кизонь тунданя, и 2024 кизоть ушетксста ни клубсь панжезень кенкшензон. Объектть строяманкса карьхцяфоль пцтай 131 миллион цалковай.
Тяни тяса мусть васта вейхкса клубнай формированиятне, хореографическяй студиясь, библиотекась, музыкальнай и художественнай школатне, 150 ломаненди зрительнай залсь.
Од зданиять ваномста шарфтфоль мяль, што ДК-ть строяманц коряс единай проектть мяльса кирдезь стане жа капитальнайста петьфоль идень садсь, Садовай ульцять эзга строяф водоснабжениянь линия.
Тяка шиня Артём Здунов примась участия Рузаевскяй райононь депутатонь Советть сессиясонза. Сон ушедовсь СВО-нь участникнень семьянь членцнонды, а стане жа Ленинградть блокаданц событиянзон эсь сельмосост няиснонды казнень максомаста, 2024 кизоня отмечави ошть-геройть воляс нолдаманц 80 кизонь топодемац. Родинань аралайхне, конат максозь эсь эряфснон, лятфтафтольхть минута кашт аф молезь ащезь.
Сессияса башка мяль шарфтфоль ётай кизонь итокненди. Доклад тись Рузаевскяй райононь оцюнясь Александр Юткин. Азфоль, што муниципальнай образованиять улихть кода сатфксонза, стане и прябаланза, конат савихть машфтомс.
Меля инвесторхнень мархта районть основной капиталозонза нолдафоль кафта миллиартта лама цалковай. Тя лездсь панжемс 400-та лама рабочай од васта и ванфтомс уликснень. Средняй заработнай платась районца арась 56 тёжяньда лама цалковай.
«Мон кеняртькшнян и марян гордость Рузаевскяй райононь марнек агропромышленнай комплексть инкса!—мярьгсь Александр Юткин.—Меля кочкаф сёронь козя урожай, кодама ашезь кочксев мзярдовок—128 тёжяньда лама тонна. Тя отраслянь эрь работникть сатфксоц!»
Районца касонды ёмла бизнесонь субъекттнень лувкссна. Мольфтеви предпринимательхнень ширеснон кирдеманц коряс эффективнай политика— бизнессь коль сяда сидеста нолясы тевс льготнай финансированиять.
Районца башка мяль шарфневи ломаттненди эрямань цебярь условиянь тиендемати: мольфтеви китнень строямасна и петемасна, петневихть-мазопневихть общественнай территориятне. Кизоньберьф петьфт 11 вайгяльбень кувалмоса муниципальнай кит, 19 куд пирьф, сяда тов мольфтеви Рузаевкать шарксонц строямац, одкстоптф 1905 кизонь Революциянь ульцять эзга скверсь и «Валда васта» общественнай вастсь.
Социальнай сферась районца стане жа аф лядонды мялень апак шарфтт. Программать коряс, конань арьсезе странань Президентсь, капитальнайста петьфт колма школатне—Рузаевкаса, Татаронь Пишляса и Трускляйса, нинге кафттнень эса петьфт спортивнай залхне. Тядде Рузаевскяй районць шумордасы «Точка роста» центраса школатнень козякофтомаснон. Культурань од кудсь панжезень эсь кенкшензон Красное Сельцо посёлкаса, районца эвондась идень тяниень пингонь поликлиника.
Артём Здунов отмечазе, што Рузаевскяй районць—стратегическяй марнек республикати. Сон занцесы ветеце вастть налоговай и аф налоговай дохоттнень коряс.
Районть мзярс ванфневи средняй и ёмла бизнесть коряс кредиторскяй шумоц, хуш 40 процентта сонь удалась кирьфтамс.
Меля федеральнай уровеньца примаф решения уликсть колмоцекс пялькста келептемс «Рузаевка» ТОСЭР-ть границанзон, мезсь лезды водендамс 2,5 миллиард инвестиция и панжемс пцтай 200 рабочай од васта.
Задачатнень ёткса, конат путфт районть инголе,—2024 кизонь объекттнень шумордамасна: Рузаевскяй райононь ТБО-нь 22 гектаронь площадьса шукшпрять рекультивацияц, Од ломанень политикань и туризмань Центрать зданиянц капитальнайста петемац, Идень центральнай библиотекать одкстоптомац, Спортивнай единоборствань центрать строямац. Тядде сави петемс кота дорожнай объектт, конатнень марстонь кувалмосна 13,5 вайгяльбе.
Артём Здунов китькстазе: работать эряви латцемс избирательхнень наказснон мяльса кирдезь.
Башка мяль республикань Оцюнясь шарфтсь кизефкснень решандамаснонды, конат сотфт Рузаевскяй райононь водоканалть мархта, сон максфоль частнай кядьс.
«Тяниень обстановкась путни инголенк од задачат. Сюкпря сембонди военнослужащайхненди и синь семьяснонды лезксонь макссеманкса. Активнайста мольфтесть од ломаттнень мархта работать. Провокациятненди пря аф макстама, минь трудонь ломаттяма. Эняльдян сембонди кирдемс марса, штоба Рузаевкась сяда тов касондоль и панчфокс панжель»,—мярьгсь Артём Здунов.
Сессиять пингста стане жа кемокстафоль 2024 кизонди Рузаевскяй районть работань планоц.