Тядянь капиталть—ремонтонь тиеманди

25 апрельста Саранскяйса, Республикань Кудса, ётафтовсь Мордовия Республикань сисемце созывонь Государственнай Собраниять колмогемонь ветиеце сессияц. Вятезе сонь Госсобраниять Председателец Владимир Чибиркин. Сессиять работаса примась участия МР-нь Оцюнясь Артём Здунов. Шинь повесткати сувафтфоль 13 кизефкс.
Госсобраниянь депутаттне пшкядсть РФ-нь Правительствать Председателенцты Михаил Мишустинонди миграционнай законодательствать цебярьгофтоманц колга кизефкс мархта. Парламентарийхне сембе ширде арьсезь омба масторонь граждаттнень рузонь кяльть коряс содамошиснонды оценкань максомати общественнай организациянь представительхнень водендамань механизмать и документть эса азозь эсь предложенияснон.
«Тя пяк важнай тема, вдь российскяй обществати суваманкса омба масторонь граждаттнень улеза рузонь кяльти, странаньконь историянцты, закононзонды и эряфонцты кельгомасна»,—китькстазе Владимир Чибиркин.
Корхтафоль организациятнень имуществаснон лангс налогть колга законть проектонц квалма. Мяль шарфтфоль деловой и торговай центратнень, а стане жа тёжянь квадратнай метрада оцю площадень аф эрямань помещениятнень лангс, коса ащихть кафет, ресторатт, мазышинь салотт, офист и лавкат.
Шинь повесткати сувафтф кизефкснень ламошкасна сотфоль социальнай ширеть мархта. Ётксост—республикасонк эряй няемас коре инвалиттнень ширеснон кирдемац. Депутатскяй инициативать мяльс сявозь, конань колга азондсь МР-нь Госсобраниять Председателенц заместителец Наталья Долматова, гражданонь тя категорияти арьсеф 15 тёжянь цалковаень лувксса эрь кизонь пандома, кона пяшкодьсыне пинеть-вятнить ветеринарнай обслуживандаманкса карьхцнень.
Парламентарийхнень решенияснон мархта лама идень семьятненди максф права нолямс тядянь капиталонь средстватнень квартирати или кудти, кона ащи синь собственностьсост, ремонтонь тиеманди. Тяда башка, ня средстватнень нльне ули кода нолдамс оцю семьяста шабатненди, конат якайхть музыкальнай школав, музыкальнай инструментонь рамаманди.
Сессияса ётай кизоня тиф работаснон колга отчёт мархта выступандасть МР-нь Счётнай палатать руководителец Николай Ларьков и Мордовия Республикаса шабать праванзон коряс Уполномоченнайсь Наталья Юткина.
Меколи Владимир Чибиркин поздравляндазень депутаттнень малаткшни Российскяй парламентаризмань шить мархта.