2 февральста ётафтовсь Мордовия Республикань сисемце созывонь Государственнай Собраниять 32-це сессияц, конань вятезе республикань Государственнай Собраниять Председателец Владимир Чибиркин. Сессияса примасть участия Мордовиянь Оцюнясь Артём Здунов, региональнай Правительствань члеттне, властень исполнительнай оргаттнень и местнай самоуправлениянь оргаттнень руководительсна.
Сессиять панжемста Владимир Чибиркин азозень ся задачатнень, конатнень тядде пяшкодемасост примама участия депутаттненди. Ётксост—специальнай военнай операциянь участникнень и синь семьянь членцнон ширеснон кирдемасна, Россиянь Президентть кочкаманзонды анокламаса местнай самоуправлениянь оргаттненди лезксонь максомась, Семьянь кизонь пуромкснень эса участиянь примамась и стак тов.
Сессияса депутаттне ванцть 17 кизефкс. Тяфта, почтовай связень организациятнень дополнительнайста ширеснон кирдеманкса сувафтовихть полафткст «О налоге на имущество организаций» Мордовия Республикань Законть 3 статьязонза.
Примафт Мордовия Республикать и Пензенскяй областть ёткса границать пяльксонц ладямаснон коряс договорхнень кемокстамаснон колга закоттне.
Сувафтовихть полафткст «О мерах социальной поддержки отдельных категорий населения, проживающего в Республике Мордовия» Мордовия Республикань Законти.
«Об Избирательной комиссии Республики Мордовия» законть кой-кона норманза тиевихть соответствияс «Об основных гарантиях избирательных прав и права на участие в референдуме граждан Российской Федерации» Федеральнай законть мархта.
Кемокстафт мировой судьят: Андрей Машков—Атюрьевскяй райононь судебнай участкань мировой судьякс, Ольга Терентьева—Чамзинскяй райононь 1№ судебнай участкань мировой судьякс.
Согласовандаф Алексей Ежовонь кандидатурац Мордовиянь Правительствать Председателенц Заместителенц вастонцты путоманц инкса. Инголи сон тиендезень вице-премьерть тевонзон.
Депутаттне кулхцондозь Саранск ошень округонь оцюнять. Игорь Асабин пачфтсь сянь колга, кода решандакшневихть ловть эзда ульцятнень урядамаснон и общественнай транспортть работанц мархта сотф кизефксне.