Владимир Чибиркинонь Краснослободскяй и Ельниковскяй райоттнень эса улеманц колга

12 апрельста Мордовиянь Госсобраниять Председателец Владимир Чибиркин ульсь Краснослободскяй районца, коса содафтсь «Безопасные качественные дороги» нацпроектть эряфс ётафтоманц мархта. Строямань объекттнень эзда фкясь—Од Карьга велети вяти кись (6,5 вайгяльбеда лама). Тяса арьсеф кить келептемац и водоотводонь тиемась.
Райононь оцюнять Алексей Буйновонь мархта Владимир Чибиркин ванозь, кода мольфтевихть работатне. Синь ушетфт пингта инголе и арьсекшневи шумордамс тонафнемань од кизоти, мезсь касфтсы тя велень школав пачфнемаса ученикнень безопасностьснон.
«Кись важнай, тяконь лувксса велеть социально-экономическяй виияманц мяльс сявозь. Од Карьгаса работай велень хозяйствань предприятия, кона эряма вастонь строямать вельде салсесыне од специалисттнень мяльснон. Теенза оцюнякс местнай советонь депутатсь Дмитрий Харитонов. Работатне улест оцю качествань»,—мярьгсь МР-нь Госсобраниять Председателец.
Тяка жа шиня Владимир Чибиркин ульсь Краснослободскяй райононь «Золотой колос» шумбрашинь кемокстамань лагерьса. Уликс корпусненди тяниень пингть строявихть кафта корпуст 49 вастонди эрсь.
Подряднай организациять руководителец Николай Шепелев азозе, што конструкциятнень строямасна мольфтеви графикс коре. Объектть максомань пингоц—май ковсь.
Райононь оцюнять Алексей Буйновонь и образованиянь районнай управлениянь начальникть Юлия Нотинать мархта Владимир Чибиркин корхтафтозь лагерть анокшинц коряс кизефкснень. Теенза ули кода примамс 200-ти молемс идь сменати.
«Проектсь ётафтови эряфс «Десятилетие детства» президентскяй программать мяльс сявозь. Мордовиянь Оцюнясь Артём Здунов башка мяль шарфни тя кизефксть лангс. Меля курокстонь строяви корпуст строяфтольхть Рузаевскяй районца. Сяс специалисттнень, конат тяни покодихть «Золотой колосса», ули эрявикс опытсна. Минь задачаньке—тиемс иттнень ваймосемаснон цебярькс»,—азозе Владимир Чибиркин.
Шить омбоце пялестонза МР-нь Госсобраниять Председателец ульсь Ельниковскяй районца. Райононь оцюнять Юрий Бекешевонь мархта ванозь Краснослободскяй центральнай районнай больницять поликлиниканц, коса здравоохранениянь первичнай звенать одкстоптомань программанц коряс мольфтеви капитальнай ремонт. Тя кармай од здания. Таштть калафнемдонза меле лядсть аньцек стенат. Тяниень пингть петеви вельхкссь, сяльде тиевихть коммуникациятне, потма ширдень отделкась и территориять благоустройствац.
«Поликлиникать петемац—Ельниковскяй райононь эряйхнень наказсна. Хуш проектсь арьсеф кафта кизонди, синь анокт тиемс ремонтть пингта инголе. Тиема сембось, мезсь эряви качественнай и доступнай медицинскяй лезксонь максоманкса»,—мярьгсь МР-нь Госсобраниять Председателец.