Сообщение Ётась эряфонь кувака ки появились сначала на Мокшень Правда.

Тя шиня Левжань школав пуромкшнесть учительхть Рузаевскяй райононь школатнень эзда, сашендсть инжихть Саранскяйста, конатнень ётксоль и Николай Ивановичень унокоц Павел Учватов.
Учватовскяй лувоматнень аноклазь Рузаевскяй райононь администрациянь Образованиянь Управлениясь, Информационно-методическяй центрась, Левжань средняй общеобразовательнай школась.

Васенда пуромфненди няфтьфоль Николай Учватовонди и сонь творчестванцты лемтьф выставкась.
Сяда тов ушедсь «Питнефтома козяшись» литературно-музыкальнай композициясь.
Левжань школаса тонафнихне сценать лангса моразь Мордовия Республикать Гимнанц.
Школать директороц Лариса Рузманова азсь седиста моли валхт тя илас пуромфненди.
«Учватовскяй лувоматне кунара ни арасть эрь кизоннекс и тячи оцю мяльса васьфттядязь сембонь Левжань школаса»,—мярьгсь Лариса Анатольевна.
Панжезень лувоматнень «Информационно-методическяй центра» МУК-ть директороц Наталья Щербакова.

—Тя конференциясь кизоста кизос кочкси коль сяда лама ломань. Пингстонза педагокне полафнихть опытса, тиендьсазь семботь инь питнить—шачема кяльть ванфтоманц инкса. Тяфтама пуромкснень пингста кепсевихть литературать, содаф земляконьконь колга кизефксне,—азозе Наталья Викторовна.
Мордовскяй (мокшень и эрзянь) народть Межрегиональнай общественнай организациянц председателец Юрий Мишанин башка мяль шарфтсь сянди, кода левжеряйхне кородозь ванфтсазь содаф ломаньцнон колга мялямть. Мокшень тя велеса шачсть Николай Учватов, содаф морсись Мария Антонова и ламотне лиятне. Сембонь синь эрявихть лятфнемс творческяй тяфтама васедематнень пингста.

Юрий Александрович азондсь организациять Исполкомонц выездной заседаниянзон колга. Тядде фкясь эздост арьсекшневи ётафтомс Рузаевскяй районца.
Сёксенда Мордовияса ули Мокшэрзянь народть съездоц, конанди анокламась мольфтеви ни. Оцюдонга оцю тя пуромксти республиказонк сайхть инь достойнай ломаттне.
Юрий Мишанин казсь школань библиотекати книгат.
Левжань школать шумордаец, Н.П.Огарёвонь лемса Мордовскяй государственнай университетонь филологическяй факультетть деканонц цифровизациять коряс заместителец Дарья Родина сувси ся ломаттнень ёткс, конат лама кизода инголе тисть ушеткс Учватовскяй лувоматненди. Дарья Викторовна лятфтазе, кода сембось эста ульсь и азсь благодарностень валхт тячиень лувоматнень аноклайснон и ётафтыснон лемс.
Мордовия Республикань Правительствать видеса Гуманитарнай наукань Научно-исследовательскяй институтть главнай научнай сотрудникоц, региональнай исследованиянь и этнологиянь отделть заведующаец, Николай Учватовонь унокоц Павел Учватов ванфтсыне Учватофнень семьяснон историянц, коензон, щятянц колга мялямть. Павел Сергеевич эрь кизоня сашенды Левжав мала ломаненцты лемтьф пуромксненди. Тя мезтьке сон азсь приветствиянь валхт пуромфненди.
«Мяляфтса, кода лувоматне ётнесть кемонь кизода инголе. Оцю спасиба сембонди, кит тиезь синь эрь кизоннекс»,—мярьгсь Павел Сергеевич.
Учватовскяй лувоматнень колга эсь мяльснон-арьсемаснон азозь «Якстерь тяштеня» идень журналть главнай редактороц Вера Брындина, писательсь, общественнай деятельсь, блогерсь Николай Храмов, лиятне.
«Питнефтома козяши» литературно-музыкальнай композициять пингста кайгсть морот, сценка лаца няфтьфтольхть Николай Учватовонь произведениянзон эзда пакшт.
Левжань школаса тонафнихнень ули синцень театральнай студиясна, сяс стирнятне и цёранятне сафтозь сембоса.
Кядень кайги цяпамат ульсть Канаефнень семейнай ансамбльснон и лия морайхнень лемс.
Пуромксса ульсь Левжань эряйсь Татьяна Дементьевна, конань цёрац Сергей Николаевич специальнай военнай операциянь участник. Сергей тюремань паксяса ашезе када боевой ялганц и лихтезе сонь вии ляцендематнень алда. Сонць Сергей стакаста ранендафоль, но боевой задачанц пяшкодезе. Тяни цёрась ащи госпитальса.
Татьяна Дементьевнанди, кода и лия тядятненди, азфоль оцю спасиба тяфтама цёрань касфтоманкса. А авать унокоц—Сергей Николаевичень цёрац, Артём, морафтозе алянцты лемтьф стихотворениять, конань сон сёрмадозе школань учительхнень лезксснон вельде.
Вятезь литературно-музыкальнай композициять начальнай классонь учительсь Артём Дивеев и рузонь кялень и литературань учительсь Наталья Учватова.
Сяда тов работать поладозь «Минь фалу карматама мяляфтомост содаф ломаненьконь», «Семьянь келеса», «Кядне тевти тонатфт» секциятне.
Творческяй илядть пингста ванфтольхть семьять и сонь питнишинзон и коензон, родной кяльть и литературать, иттнень тонафтомаснон мархта сотф и лия эрявикс кизефксне.
Татьяна АЛЬШИНА.
Фототне Николай КАРАНОВОНЬ.

Сообщение ЛЕВЖАСЬ МЯЛЯФТСЫ ЭСЬ ЦЁРАНЦ появились сначала на Мокшень Правда.

Сообщение Кельгозе эсь масторонц появились сначала на Мокшень Правда.

Иван Васильевич Чигодайкин шачсь 1920 кизонь 11 сентябрьста простой крестьянонь семьяса. Сире Сендруса шумордазе семилеткать, сяльде тонафнесь Краснослободскяй педагогическяй училищаса, Мордовскяй госпединститутса. 1939 кизоня тертьфоль Якстерь Армияв. Иван Васильевич—Великай Отечественнай войнань участник, примась участия Москуть и Сталинградть инкса тюрематнень эса, Курскяй битваса. Тюрсь фашисттнень каршес аф аньцек оружияса, но и пераса, няфтемок эсь прянц цебярьдонга цебярь армейскяй журналистокс и литработникокс «Боевая красноармейская» и «Гвардеец» дивизионнай газетатнень эса. Казьф Якстерь Тяштень кафта орденца, боевой медальса.
Демобилизацияда меле Иван Васильевич тонафнесь Горьковскяй областной партшколань журналистскяй отделенияса. Аделамдонза меле ульсь Мордовскяй радиокомитетонь политвещаниянь редакторкс, «Строитель» газетань ответственнай секретарькс, «Кабельщик» газетань редакторкс, «Приборостроитель» газетань литературнай сотрудникокс.
Чигодайкинонь мокшень кяльса васенце стихонза лиссть 1938 кизоня «Колхозонь эряф» журналса, «Мокшень правда» газетаса. Тяшнесь очеркт и стихт фронтсовок, а войнада меле седиец кошардсь азондомс фронтонь китнень колга, кода аралафоль Родинась, кода тапафоль врагсь, кодама кеняртьфти тефт ушедсть тиендевома шачема ширеса. Стихонза лисендсть коллективнай ламоц сборникнень эса. Иван Васильевич сёрмадсь лама очерк, статья, фельетон Мордовиянь труженикнень колга, лихнезень лангти эряфонь афсатыкснень, шназень тевонь кельгихнень.
1951 кизоня Мордовскяй книжнай издательствась нолдазе «Шачема мастор» стихотворениянь васенце сборниконц, коза сувасть военно-патриотическяй темань и шачема крайть кельгоманц колга стихонза. 1959 кизоня башка изданиякс нолдафоль Чигодайкинонь «Кши и сал» поэмац. Сон кандсь теенза оцю поэтическяй слава. Тя поэмась нолдафоль и рузонь кяльса. Произведениять эса авторсь азонды ломаттнень стака эряфснон колга, кода велева кемокснесь Советскяй властсь, кода ся пингть стясть и хозяйственнай оцю сталмотне. Тяфтама велекс и ульсь ингольдень Сире Синдровскяй райононь Колапа велесь.
Иван Васильевичень кой-кона стихонзон лангс композиторсь Г.Павлов сёрмадсь музыка («Комбайнерка», «Мордвин» и лиятнень).
Сембоц авторть лиссть стихонь ниле сборниконза: «Шачема мастор», «Кши и сал», «Ёндолсь кфчядсь», «Кшить таньфоц».
1966 кизоста сявомок Чигодайкин СССР-нь Писателень союзонь член.
Поэтсь тусь эряфста 1985 кизонь 21 ноябрьста. Калмаф Саранскяйса.
Сире Сендру велень эряйхне аф юкснихть колганза. 2020 кизоня келиста и мяляфтовиста ётафтфоль Чигодайкинонь шачемста 100 кизонь топодемати лемтьф илась, а сяльде сафоль мяльс эрь кизоня ётафнемс Чигодайкинскяй лувомат.
Омбоце лувоматненди Сире Сендру велень школав пуромкшнесь аф кржа ломань. Почётнай инжихнень ётксоль Российскяй Федерациянь Сенаторсь, Россиянь Финно-угорскяй нароттнень Ассоциацияснон председателец, Сире Сендру велеса шачф-касф мокшалясь Пётр Тултаев.
—Тейне удалась улемс аф ламода содафокс Иван Васильевич Чигодайкинонь мархта,—азозе Пётр Николаевич.—Шабалень эста, мзярда поэтсь сашенткшнель Саранскяйста Сире Сендрув—шачема-касома уженязонза. Мялямсон сон лядсь интеллигентнай, оржа ёнь мархта ломанькс. Тячи минь лама корхнетяма ся кепотькснень колга, конатнень лангса ули кода касфтомс-воспитандамс од поколениять. Иван Васильевичень творчествац и эряфонь киц—тя эсь наротценди и Родинати служамань цебярь пример. Мзярда фашисттне врьгядсть странаньконь лангс, сон эста пединститутонь студентсь, войнань васенце шитнень ни тусь доброволецокс сонь араламонза. А сяльде патриотическяй темась занясь оцю и няевикс васта стихонзон и поэманзон эса. Сире Сендру велень поэтть Иван Чигодайкинонь творчествац—странаньконь литературнай наследиянц пяльксоц.
Пётр Николаевич Тултаев лувозень земляконц мокшень кяльса стихонзон и азсь мяль нолдамс од сборникса сонь произведениянзон.
Чигодайкинонь творчестванцты оцю питне макссть Мордовия Республикань Народнай поэтсь Рая Орлова, Мордовия Республикань Заслуженнай писательсь Николай Голенков. А.С.Пушкинонь лемса Национальнай библиотекань отделонь главнай библиотекарсь Вера Пронина няфтсь презентация Чигодайкинонь творчестванц и эряфонц колга, азондсь художественнай произведениянзон квалма, конат ванфтовихть библиотекать фондонзон эса. Тяда башка, Вера Ивановна казезень Мордовскяй (мокшень и эрзянь) народть Межрегиональнай общественнай организациянц Благодарностенц мархта Сире Сендру велень кой-кона эряйхнень, конат лама тиендихть мокшэрзянь культурать, кяльхнень, койхнень-обуцятнень ванфнеманкса-виияфнеманкса.
Мокшень и рузонь кяльса эсь стихснон, а стане жа Чигодайкинонь стихотворениянзон пуромксса лувозь МР-нь Заслуженнай писательсь Николай Циликин, «Якстерь тяштеня» идень журналть главнай редактороц Вера Брындина, Краснослободскяй райононь «Слобода» литературнай объединениянь члеттне, Сире Сендру велень школань тонафнихне.
Иван Васильевич Чигодайкин ётась эряфонь аф тёждя ки, служась перанц мархта мокшэрзянь литературати и журналистикати. Кадсь эсь мельганза цебярь стихт, поэмат, очеркт и морот. Сонь произведениянза лядсть эряфса и ломаттнень седиса.
Ольга ЕВДОКИМОВА.
Фототне Николай КАРАНОВОНЬ.

Сообщение СЛУЖАСЬ МОКШЭРЗЯНЬ ЛИТЕРАТУРАТИ появились сначала на Мокшень Правда.

Журналистонь кизе аф весть вятнемань содаф Геройть мархта васедема. Мяляфтса, 90-це кизотнень ушетксста сашендсь Михаил Петрович Казаньцта эсь шачема ширезонза. Мон, кода Мордовиянь Гостелерадионь корреспондент, васьфтине сонь «Саранск» гостиницаса. Азыне киян, местема сань…
—Республикань радионь кулхцондыхне улихть павазуфт, кулемок тонь вайгяльцень,—мярьгонь мон, мзярда няине, што мес-бди аф мяль вельде ушеткшнезе корхнеманц мархтон оцю инжись, варжакснесь магнитофононь микрофонть лангс.
—Улема, карматада кизефнемон сянь квалма, кода вражескяй самолётса ворьгодемда меле повонь советскяй концлагери?—казямста кизефтемань Михаил Петрович.
Мон цють абондонь, но сякокс аф эряскодозь ушедонь эсь аппаратозень аноклама. Меле ни сонга ляпомсь, а мзярда содазе, што мон шачемас коре Ковылкинскяй районцта, эста ни корхнеманьке ладявсь сяда лац. Сияк шарьхкодсь, што мон аф сятнень эзда, кие вешенди «сенсацият».
Азондозе, кода ворьгодсть пленцта, кодама тапоркст васьфнесь Родинасонза работама вастонь вешендезь.
—Тонць шарьхкотьк, вдь улеть пленца,—и ингольдень содафонза шарфнезь шамаснон шири…
—Советскяй концлагерьса ашелень,—азозе Девятаев.—Тяфта и блокнотозтка тяштьк и микрофононь плёнкати. Особай отделса, виде, ламос кизефнесть эсонк. Тевсь вов мезьсоль,—азондсь сяда тов Михаил Петрович,—следовательхне васенда афи шарьхкодезь минь подвигоньконь масштабонц. Кода тяфта, минь, пялес вачеда, осалготф узникне кеподеськ менельти вражескяй оцю самолётть? Сяс васенда афи верондасть тейнек. Фильтрационнай пунктса ламоксть кизефнемда меле нолдамазь куду. Тяни журналисттне коль кизефнихть эсон советскяй концлагерть колга. А мезе азан, кда ашелень тоса. А допроснень пингста особисттне сяда оцю мяль шарфнесть фашистскяй ракетнай полигонть лангс. Минь няфтеськ картаса, коса сон ащи, кода немецне кяшендихть эсонза. Тяда меле минь авиацияньке ёрясть тов бомбат и машфтозь Гитлеронь «Фау» ракетанзон. Мон няфнине советскяй конструкторхненди мода алдонь цехнень, коса ванфневсть ракетань двигательхне-месне.
Тяда меле нинге аф весть васетькшнень М.П.Девятаевонь мархта. Сон сашенкшнесь «Мокшень правда» газетань редакцияв. Мяляфтса, пяк дивандаме, мзярда 1995 кизоня Германияста самда меле сувась редакциязонк и азондсь тоза якаманц колга. Васетькшнесь и ся лётчикть мархта, конань немецне кучсезь ворьфтьф самолётть машфтома. Тя тиемс теенза ашезь удала.
—Германияса лиссь минь подвигоньконди лемтьф фильма. Сонь мекольце лентац аделавсь дикторонь вайгяльса: «Вов кода эряви кельгомс эсь Родинаце!» Бльшем, немецне минь подвигоньконь примерса тонафнесазь эсь од поколенияснон. А минь странасонк «Девятаев» фильмась тифоль аньцек аф кунара.
Кода ни азфоль, геройхнень подвигснон колга книгада тяштьф пяк лама. Вов ванондса «Фашистскяй пленцта лиемась…» сборникть (авторсь-составительсь Н.В.Харин.—Кропоткин, 2011. Печатлаф «Книга» ЗАО-са). Эсонза азондови пленцта мяньфнень судьбаснон, сянь колга, кода синь шачема ширесост панчфтольхть «Адста ворьгодемась» лятфнемань знакне. Тянкса лама тись республикань Мемориальнай музейть сотрудникоц И.С.Бурнайкин.
Сборникть автороц ванозень архивнай каготтнень и синь вельдест няфтезе, конашкава оцю подвиг тисть ня советскяй ломаттне, а сяда пяк лётчиксь Девятаев.
Вов мезе азондови сборникса Узедом островть колга:
«Нинге 1936 кизоня Пенемюнде велень эряйхне ётафтфтольхть эряма лия вастс. Гитлеронди эрявсь васта ракетнай вооружениянь программать пяшкодемс. Строяфтольхть цехт, испытательнай станцият, лабораторият, электростанция, ангар, кутт лагерень тёжятть сотрудниконди, военнопленнайхненди концлагерь. Тяса работасть 36 профессор, 8000 специалист и 16 тёжянь пленц повф ломань».
Тя сборникть лувомста шарфтонь мяль Татарстанонь Лятфнемань книгать редакторонц заместителенц М.Черепановонь статьянц лангс, кона ульсь мекольцекссь Девятаевонь мархта корхнемста. Сон азозе, што легендарнай лётчикть подвигоц аф аньцек сянь эса, што фатязе и кеподезе менельти вражескяй самолётть.
М.Черепановонь валонзон коряс, М.П.Девятаевонь подвигоц лездсь кеподемс советскяй ракетнай техникать виияфтоманц. Вдь аф стак, мзярда 1957 кизоня лийкстась Модать перьф васенце искусственнай спутниксь, конструкторсь Королёв лятфтазе и лётчикть Девятаевонь, конань мархта войнада меле якасть Узедом острову ведьса ваяфтф цехнень эзга ракетань пялькснень вешендема. Тя сембось кондясти эсь ракетнай программаньконь эряфс ётафтомста. Тянивок, мзярда мольфтеви специальнай военнай операциясь, мзярда минь «Калибраньке» тапсесазь вражескяй объекттнень и техникаснон, эряви аф юкснемс М.П.Девятаевонь и сонь ялганзон подвигснон колга.
Фёдор Гаврилов.
Снимкаса: М.П.Девятаев и сонь семьяц марса тя статьять авторонц мархта Ковылкинскяй райононь Кацялай велеса (1999 кизось).

Сообщение Сонь лацонза лият аш появились сначала на Мокшень Правда.

Справканьке: Советскяй Союзонь Геройсь, легендарнай лётчиксь-истребительсь Михаил Петрович Девятаев (1917-2002) шачсь 8 июльста Мордовиянь Торбеево посёлкаса крестьянонь семьяса. Казанскяй ляень техникумса и аэроклубса тонафнемать аделамдонза меле, 1938 кизоня ушедсь работама баркасонь, кона уендсь Волгать эзга, капитанонь помощникокс. Тяка кизоня тертьфоль служама Якстерь Армияв. 1940 кизоня аделазе Чкаловскяй военнай авиационнай училищать.
Великай Отечественнай войнать ушедомста Украинскяй 2-це фронтонь гвардиянь 104-це истребительнай авиаполконь звенань командирсь, старшай лейтенантсь Михаил Девятаев менелень тюремаса прафтсь-плхтась фашистскяй 9 самолётт. 1944 кизонь 13 июльста менелень стака бойса самолётоц крьвястьфоль и сон ранендафста сявфоль пленц.
1945 кизонь 8 февральста военнопленнаень группась Пенемюнде концлагерьса, кона ульсь германиянь Узедом островса, шавомок конвоирть, сявозе «Heinkel»-111 секретнай бомбардировщикть. Самолётса, конань вятезе лётчиксь Михаил Девятаев, синь ворьгодсть пленцта и валгсть советскяй войскань расположенияса. Секретнай даннайхнень вельде, конатнень синь пачфтезь миннетненди, Узедомса аэродромсь и ФАУ ракетань секретнай центрась ульсть тапафт-плхтафт.
1945 кизонь ноябрь ковста сявомок Михаил Девятаев ульсь запасса. Работась ляень Казанскяй портса ведьалдонь паця мархта пассажирскяй кораблень капитанкс.
Советскяй Союзонь Герой лемсь Михаил Петрович Девятаевонди максфоль 1957 кизонь 15 августста. Сон казьфоль Ленинонь, Якстерь Знамянь, I и II степенень Великай Отечественнай войнань орденца, лама медальса. Михаил Девятаев Мордовия Республикань (1997 кизось), Казанень (1987 кизось), Германиянь Вольгаст и Циновичи ошень Почётнай гражданин.
Михаил Петрович Девятаевонь эряфонц и подвигонц колга сёрматфт книгат, стихт и ладяфт морот. Советскяй Союзонь Геройсь сёрмадсь книгат, коса азондсь эсь подвигонц колга. «Полёт к солнцу» и «Побег из ада» лем ала синь оцю тиражса нолдафтольхть Саранскяйса, Казаньца, Берлинца, Варшаваса, Софияса и Европань лия столицатнень эса.
Кулось М.П.Девятаев 2002 кизонь 24 ноябрьста. Калмаф Казань ошень Арскяй калмалангонь Героень аллеяса. Калмонц лангс путф стела, коса ащи М.П.Девятаевонь скульптурац.

Патриотическяй мероприятиять мяльса кирдезь тяфта жа панжевсь «Эряфсь—легенда» фотоснимкань и историческяй документонь выставкась, кона лемтьф Великай Отечественнай войнаса Сяськомати и М.П.Девятаевонь подвигонцты.
Мероприятияса примасть участия республикань культурань и искусствань, общественнай деятельхть, поэтт, писательхть, журналистт, Советскяй Союзонь Геройть М.П.Девятаевонь лемса «Мялям» поисковай отрядонь боецт, вузонь и колледжень студентт, школаса тонафнихть. Почётнай инжикс ульсь Геройть цёрац—Александр Михайлович Девятаев.
Патриотическяй мероприятиять и фотоснимкань и историческяй документонь выставкать, коса азондови Михаил Девятаевонь эряфонц и подвигонц колга, панжемаснон мархта пуромфнень поздравляндазень республикань культурань, национальнай политикань и архивнай тевонь министрть заместителец Николай Бычков. Сон мярьгсь, што патриотическяй работась народоньконь мархта, сембода пяк од ломаттнень ёткса, Культурань министерствань учреждениятнень эрь шинь работаса лиссь васенце вастти, сяс мес специальнай военнай операциясь, кона мольфтеви нацисттнень эзда соотечественниконьконь араламанкса, няфтезе: Россиянь лама национальностень народса патриотизмась шиса! Сонь эряви виияфнемс, азондомок тяниень пингонь од ломаттненди тяфтама Геройхнень, кода Михаил Девятаев, подвигснон колга.
Александр Девятаев азсь оцю спасиба музеень сотрудникненди и республикань Культурань, национальнай политикань и архивнай тевонь министерствань руководствати тя мероприятиять анокламанкса. Сон азозе, што тядде Волга ляйть эзга ушедсь уендема тяниень пингонь ведьалдонь «Метеор» теплоходсь, конанди максф «Михаил Девятаев» лем.
Мекпяли Александр Девятаев казсь музейти, республикань библиотекатненди и культурань лия учреждениятненди книгат, коса азондови Советскяй Союзонь Геройть эряфонц и подвигонц колга.
Мекпяли пуромфненди патриотическяй моронь концерт няфтсть Саранск ошень Культурань дворецонь солисткатне Ирина Беляева и Марина Кочеткова.
Тяка жа шиня М.П.Девятаевонь подвигонц лемс Мордовиянь сембе библиотекатнень эса ётафтовсть «Мужествань урокт». А 8 июльста, Советскяй Союзонь Геройть шачема шиста, патриотическяй мероприятият ётафтовсть Торбеево посёлкаса—М.П.Девятаевонь Кудса-музейса.
Владимир
Нестеров.

Сообщение Подвигонц вельде касфтовихть патриотт появились сначала на Мокшень Правда.

Аф ваномок прябалатнень лангс, Малькинскяй лувоматне ётафневихть эрь кизоня. Колмогемонь кизоста лама содаф поэт, учёнай, журналист, композитор, скульптор, артист сашендсь Кяшалу. А.С.Малькинонь стихонзон лангс сёрматф аф фкя мора, стих. Синь кайгихть аф аньцек Малькинскяй лувоматнень, но и илатнень, концерттнень эса. А «Кяшал веленяй» морось, конань сёрмадозь Нина Кошелева и Илья Вешкин, арась ня лувоматненди Гимнакс.
Колмогемонце Малькинскяй лувоматне лемтьфтольхть содаф поэтть 100 кизонь топодеманцты. Райононь Культурань кудть фойесонза Атерень идень библиотекась аноклась «Эрь строчкаса седиень лямбоц» лем ала выставка. А лезкс тя тевса макссь А.С.Пушкинонь лемса Национальнай библиотекань главнай библиотекарсь В.И.Пронина. Выставкать мархта инжихнень содафтозень Л.К.Вешкина. Сон ащесь ниле пяльксста. Тясотольхть ташта фотографиятне, коса сонць Малькин, писатель ялганзон и мала раднянзон мархта. Няевикс вастсот литературнай критикнень, содаф писательхнень статьясна, рецензиясна и мяльсна, конат арасть сонь творчестванц колга цитатакс. Синь ётксост А.В.Алёшкин, М.И.Малькина, М.Г.Имяреков, В.И.Мишанина, конат аф весть ульсть Малькинскяй лувоматнень эса.
А.С.Малькинонди лемтьф оцю илась ушедсь Кяшал велеса. Саранскяйста саф инжихне, райононь делегациясь путсть панчфт А.С.Малькинонь калмонц лангс. Ётафтфоль аф оцю митинг, коса корхтасть Кяшал велень поселениянь оцюнясь П.Н.Лёвин, Мордовскяй (мокшень и эрзянь) народть Межрегиональнай общественнай организациянц председателец, филологическяй наукань докторсь Ю.А.Мишанин, Мордовия Республикань Заслуженнай писательсь Н.Б.Голенков, Перевесье велень основной общеобразовательнай школань директорсь С.Н.Руськина, Атерень поэтсь, трудонь ветеранць М.П.Надин.
Кяшалонь основной общеобразовательнай школаса инжихнень кшиса-салса васьфтезь ученикне. Национальнай щамса щаф стирнятне лувозь А.С.Малькинонди лемтьф стихснон, сонцень поэтть произведениянзон, а тяфта жа Атерень районца шачф-касф поэттнень стихснон. Шабатнень мархта работась мокшень кялень и литературань учительсь Н.Г.Панькина.
Школать инголе стяфтф поэтть бюстоц, конань тиезе Мордовиянь содаф скульпторсь Н.М.Филатов. Школать стенаса лятфнемань плита. Сонь тиезе Москувонь скульпторсь, Малькинонь землякоц Пётр Добаев (Офта). Инжихне путсть панчфт, лямбе валса лятфтазь скульпторхнень лемснон. Меле корхтамась поладовсь школань историко-краеведческяй музейса, коса ули уженя и А.С.Малькинонди. Экскурсиять ётафтозе мокшень кялень и литературань учительсь Л.П.Байчурина.
Литературнай оцю ила ётафтовсь школань фойеса. Инь няевикс вастса ащесь содаф поэтть портретоц. Вал максфоль Атюрьевскяй райононь оцюнять социальнай кизефкснень коряс заместителенцты Н.С.Шароновонди.
—Топодсь 30 киза, кода ушедсть ётафневома Малькинскяй лувоматне,—азозе Николай Семёнович.—Аф ваномок ковидть, лия туфталхнень лангс, синь ётнесть эрь кизоня и аф кальдявста. Александр Степанович 33 кизоса примафоль СССР-нь Писателень союзу.
Тя корхтамать поладозе Мордовия Республикань культурань, национальнай политикань и архивнай тевонь министрть васенце заместителец А.И.Карьгин. Сон отмечазе, што тячи А.С.Малькинонди лемтьф илат ётафтовихть аф аньцек Атюрьевскяй, но и лия райоттнень эса, Саранскяйса. Александр Степановичень творчестванцты кельгомась кизоста кизос аньцек касы.
Лама цебярь мяльда-арьсемада азсть Мордовскяй (мокшень и эрзянь) народть Межрегиональнай общественнай организациянц председателец, филологическяй наукань докторсь Ю.А.Мишанин, Мордовия Республикань Писателень союзть Председателенц заместителец, Мордовия Республикань Заслуженнай писательсь Н.Б.Голенков, Россиянь Писателень союзонь членць Н.Л.Храмов.
Оцю мяльса илас сафне кулхцондозь «Мокшень правда» газетать главнай редакторонц О.В.Евдокимовать, «Якстерь тяштеня» идень журналть главнай редакторонц В.И.Брындинать, «Мокша» журналть главнай редакторонц М.В.Аникинать выступленияснон. Синь нинге школаса тонафнемста примсесть участия Малькинскяй лувоматнень эса.
Атерень районца шачсь лама содаф, асу ломаньда. Нят: Ф.М.Костяйкин, И.В.Надёжкин, И.И.Поршин, Н.Н.Балашов, конат тяшнесть стихт, нолясть книгат. Н.Н.Балашов эряй Севастопольса, вятьсы мордовскяй землячествать. Рузонь, мокшень кяльса тяшти стихт, морот. Ётафни тоса Малькинскяй лувомат.
Педагогическяй трудонь ветеранть, Кяшалонь мокшавать Н.Н.Трунькинать аляц, Н.П.Чепайкин, цебярь ялгаль Александр Степановиченди. Поэтсь сидеста сашендсь ширезост, седикс-ваймокс корхнесь фронтовик ялганц мархта. Нина Николаевна эрь кизоня примси участия Малькинскяй лувоматнень эса. Маряй гордость эсь земляконзон инкса. Тяддень лувоматнень эса морафтозе Ф.М.Костяйкинонь А.С.Малькинонди лемтьф стихонц.
Колмогемонь кизоста кит аньцек ашельхть Малькинскяй лувоматнень эса. Васенце илатнень ётафтомста активнай участия примасть М.В.Кондрашкин, В.Н.Равочкин, В.М.Сиркин, М.Я.Зеленов, лиятне. Ламоксть сашендсь илас Чудинкань поэтсь В.Ф.Ерцкин. Сон лемдсь аф фкя стих А.С.Малькинонди.
Атерень Культурань кудса тя шиня кайгсть мокшень морот, конатнень моразь Дарья Гальцова, Нина Шумкина, Марина Калинкина, Валентина Акиняева, Ирина Тремасова и лиятне. Игорь Тишкин, Михаил Вешкин, Дарья Петяйкина, Ирина Макарова лувозь А.С.Малькинонь стихонзон. Ульсть казнетка. Атюрьевскяй райононь администрациясь Почётнай грамотаса казезень Кяшалонь средняй общеобразовательнай школань учительхнень В.А.Сятишевать, Л.С.Кяльгинать, тонафнихнень Кристина Чепайкинать, Дарья Петяйкинать и лиятнень.
Колмогемонце Малькинскяй лувоматне ётасть мялень салайста. Эсост примась участия лама ломань. Илать анокламаса аф кржа вий путсть Атюрьевскяй райононь оцюнять социальнай кизефкснень коряс заместителец Н.С.Шаронов, Кяшал велень поселениянь оцюнясь П.Н.Лёвин.
Илья ВЕШКИН,
Россиянь Писателень
союзонь член.

Сообщение «ЭРЬ СТРОЧКАСА СЕДИЕНЬ ЛЯМБОЦ» появились сначала на Мокшень Правда.

Сообщение Кадсь эсь колганза цебярь лятфнемат появились сначала на Мокшень Правда.

Сергей Ахромеев шачсь Тамбовскяй губерниянь Спасскяй уездонь (тяни Мордовия Республикань Торбеевскяй райононь) Виндрей велеса крестьянонь семьяса. 1930 кизоня тядянц мархта ётась эряма Москуву. Школада меле поступась М.В.Фрунзень лемса Высшай военно-морской училищав. Васенце курсть шумордамдонза меле 1941 кизоня примась участия Ленинградть инкса тюремаса.
Сяка кизонь декабрьста ранендафоль. Но тянь лангс Сергей Фёдорович солдатонь тевонц ашезе када. 1944 кизоня ульсь автоматчиконь батальононь командиркс. Великай Отечественнай войнань кизотнень воявась Ленинградскяй, Сталинградскяй, Южнай и Украинскяй нилеце фронттнень эса.
1981 кизоня теенза максфоль Ленинскяй премия. Кизода меле—Советскяй Союзонь Героень, 1983 кизоня Советскяй Союзонь Маршалонь почётнай лепне. Мордовияса сон ськамонза, кинь ули тяфтама оцю званияц.
Эсь лятфнемасонза Сергей Фёдорович сёрмадсь: «Сембода пяк эряфсон кельгса Родинать и аньцек сяльде—семьязень». Сон ётазе марнек Великай Отечественнай войнать. Солдатонь и офицеронь тевонц вятезе виде ваймот, ульсь вернайкс Отчизнати. Народнай кельгомать коряс тяфтама серьс сонь ули кода путомс фкя рядс полководецнень Георгий Жуковонь и Александр Василевскяень мархта. Маршалть калмама вастсонза, Троекуровскяй калмалангса, сёрматфт колма валхт: коммунист, патриот, солдат. Сергей Ахромеев марнек эряфонц лемдезе Родинати служамати. Кулось 1991 кизонь 24 августста.
Геройть и маршалть юбилеенцты Мемориальнай музейсь аноклась мялень салай выставка, коса азондови Сергей Ахромеевонь боевой и эряфонь кинц колга: фотографият и документт. Музейть экспозициясонза улихть личнай вещанза, маршалонь картузоц и мундироц. Сембе экспонаттнень ванозь ветераттне и школаса тонафнихне.
Мордовия Республикань Правительствать видеса Гуманитарнай наукань Научно-исследовательскяй институтонь директорть заместителец, Мордовскяй (мокшень и эрзянь) народть Межрегиональнай общественнай организациянц председателец Юрий Мишанин пуромксса лятфтазе, кода корхнесь Советскяй Союзонь маршалть мархта. Эста Юрий Александрович ульсь «Вестник Мордовского университета» научно-публицистическяй журналонь главнай редакторти заместителькс.
«Наши земляки» рубрикати интервьюс Юрий Мишанин якась Ахромеевонди Москуву, Кремляв. Ся пингть Сергей Фёдорович ульсь Россиянь Президентть военнай советникоц.
Корхтамась мольфтевсь Советскяй Союзонь Геройть шачема уженянц, армиять, политикать колга. Юрий Мишанин лятфни: «Сергей Фёдорович ульсь афкуксонь военнайкс и патриотокс».
Сергей Ахромеевонь колга лямбе валхт азсть Государственнай Собраниянь Председательть заместителец Наталья Долматова, Мордовия Республикань Оцюнять и Мордовия Республикань Правительствать Администрацияснон Руководителенц заместителец—Внутренняй политикань Управлениять начальникоц Александр Ратников, Торбеевскяй райононь администрациянь оцюнять социальнай кизефкснень коряс заместителец Николай Киреев и лиятне. 28№ школань ученикне лувсть стихотвореният.
Оксана плотникова.

Сообщение Сергей Ахромеев:«Сембода пяк эряфса кельгса Родинать» появились сначала на Мокшень Правда.

1988-98-це кизотнень Иван Никитович «Мокшень правдаса» вятезе литературань и искусствань отделть. Ломанць пяк ответственнаель. Литературати и искусствати лемтьф материалхненди газетаса фалу макссевсь лама васта, лангозост шарфневсь башка мяль. И тя шарьхкотьф. Кудашкинонь кабинетоц шава ашель мзярдовок. Каннезь эсь сёрматфснон содаф поэттне, писательхне, учёнайхне. Иван Никитович сембонь мархта мушендсь фкя кяль. Седикс-ваймокс корхнекшнесь эрть мархта. Финцнень колга тяшнесь очеркт, юбилейнай статьят. Омбонцнень ванондозень сёрматфснон: шнакшнезень, няфнезень лафча ширеснон, петнезень. Кядялганза ётаф материалхне фалу шнакшневсть редколлегияса, макссесть оцю питне планёркаса газетаса покоди журналисттне, редакторхне. Весть, тя ульсь ётай веконь кафксогемонце кизотнень песта (эста нинге студентолень), редакцияста гайфтсть Н.П.Огарёвонь лемса Мордовскяй госуниверситетонь филологическяй факультету и пачфтезь, што тердемазь «Мокшень правдав» планёркас. Эводень. Эста пцтай эрь номерса лисендсь «Кячказ», «Редакциять почтаста» и лия лопанятне, коза каннень критическяй материалхт, оржа сигналхт. А кинь мялезонза туй критикась. Сань редакциять планёркас, коса пачфтезь, што литературати лемтьф статьязень редколлегиясь лувозе инь цебярькс и тянкса тейне пандыхть кафтонь-крда гонорар. Шнамазь, люпштазь кядезень, арьсесть творческяй од сатфкст. Иван Никитович азозе: «Тя цебярь ушеткссь. Сяда тов тяфта вятьк. И лувись вештанза, мутанза». И ашель кода мархтонза аф согласиндамс. Сонць Иван Никитович ашезь панце аф казнетнень, аф лепнень мельге. Фалу ульсь лувить мархта. Васетькшнесь сидеста. Ётнезень марнек мокша велень школатнень. Сидеста улендсь вуснень, техникупнень, училищатнень, трудовой коллектифнень эса. Ломаттненди пачкотькшнесь сонь валоц. Иван Никитович эрь васьфтемстонза лама корхнекшнесь мокшень кяльть, литературать кельгомаснон колга, койхнень-обуцятнень ванфтомаснон квалма.
Шачсь-кассь И.Н.Кудашкин Ельниковскяй райононь Мокшень Мазканя велеса 1936 кизонь 15 сентябрьста.
Тонафнесь эсь велень школаса, сяльде—вузса. Мордовскяй госуниверситетонь филологическяй факультетть шумордамдонза меле покодсь эсь велесонза клубонь заведующайкс. Мянь 22 киза трудендась литературнай сотрудникокс «Трибуна колхозника» Ельниковскяй районнай газетаса. Ульсь корреспондентокс Мордовиянь Гостелерадионь комитетса, редакторкс Мордовскяй книжнай издательстваса.
Комсь кизоцоль, мзярда «Мокша» журналса печатлафоль «Тумоня» лем ала васенце стихотворенияц. А 1969 кизоня лиссь «Китнень крайге келуфт» лем ала стихонь васенце пусмоц. Тяда меле лисендсть «Лихтибрятне шавихть пайкт» (1977 к.), «Бславамака, тядяй, кис» (1982 к.), «Нармоттне лиихть шинь стямав» (1986 к.), «Шудинясь-ляйнясь сятявня» (1990 к.) и лия книганза. 1980 кизоня Мордовскяй книжнай издательстваса лиссь рузонь кяльса «Песни журавлиного неба» лем ала стихонь и поэмань пусмоц. Рузонь кяльста поэтть произведениянзон ётафтозень И.Рыжиков.
И.Н.Кудашкин лама сёрмадсь литературать, кялень кизефкснень колга. Теманза оржатольхть, пяк интереснайхтельхть.
Кивок ашезь арьсекшне сянь квалма, што тяфтама рана сязеви И.Н.Кудашкинонь эряфоц.
1998 кизонь 24 апрельста апак учсек кулось. Теенза ашель 62 кизовок.
Илья ВЕШКИН,
Россиянь Писателень союзонь член.

Сообщение «ПАВАЗУВАН, МЕС МОРОНЬ ЛАТЦЕМА КУНДАНЬ» появились сначала на Мокшень Правда.